Gender əsaslı zorakılıq təkcə qadınların deyil, bu zorakılığa şahid olan və ya dolayısı ilə məruz qalan uşaqların da həyatını yaralayır. BMT-nin hesabatına görə, ailə daxilində zorakılığa şahid olan uşaqların 80%-i psixoloji travma, narahatlıq və inkişaf problemləri yaşayır. Bu uşaqlar böyüdükcə ya özləri zorakılığa meyilli olur, ya da davamlı qorxu içində yaşayırlar.
Məhz bu həssas qrupa diqqət çəkmək məqsədilə “İnkişaf-2006” Sosial Dəstək İctimai Birliyi 2025-ci ilin noyabr-dekabr aylarında İmişlidə gender əsaslı zorakılığa qarşı 16 günlük fəallıq kampaniyası təşkil etmişdir. Tədbirlərdə uşaqların psixoloji sağlamlığının qorunması, zorakılığın onların gələcək həyatına təsirləri və valideynlərə məsuliyyətli davranış vərdişlərinin aşılanması müzakirə olunmuşdur.
Unutmayaq ki, zorakılığın ən ağır fəsadları ən günahsızlara – uşaqlara qalır. Hər bir gülüş, hər bir sağlam böyüyən uşaq zorakılığa qarşı verilən mübarizənin ən böyük qələbəsidir. “İnkişaf-2006” İctimai Birliyi bu istiqamətdə fəaliyyətini davam etdirərək, gələcəyimiz olan uşaqları qorumaq üçün çalışır.
