ABŞ prezidenti Donald Tramp Avropada getdikcə daha çox siyasi yük kimi qiymətləndirilir. Vətəninfo.az xəbər verir ki, bu barədə Politico nəşri məlumat yayıb.
Nəşrin yazdığına görə, əvvəllər Trampın ideoloji müttəfiqləri hesab olunan Avropanın ifrat sağçı qüvvələri artıq onunla açıq yaxınlıq nümayiş etdirməkdən çəkinirlər. Onlar hesab edirlər ki, Trampa bağlılıq seçki nəticələrinə mənfi təsir göstərə bilər.
Xüsusilə, Macarıstanın baş naziri Viktor Orban parlament seçkilərində məğlubiyyətə uğramazdan əvvəl belə ABŞ liderindən uzaqlaşma meylləri müşahidə olunurdu. Analitiklərə görə, bu məğlubiyyət, həmçinin İran müharibəsinin nəticələri və Trampın Papa ilə yaşadığı gərginlik Avropadakı sağçı qüvvələrin mövqeyinə təsir edib.
Fransada ifrat sağçı Milli Birlik partiyasının nümayəndələri də ABŞ-la yaxınlığın seçicilər arasında müsbət qarşılanmadığını bildirirlər. Partiya lideri Marin Le Pen həmkarlarına Trampla münasibətlərdə məsafə saxlamağı tövsiyə edib.
Oxşar yanaşma Almaniyada da müşahidə olunur. Almaniya üçün Alternativ (AfD) partiyasının bəzi üzvləri seçkilər ərəfəsində Trampa yaxınlığın riskli olduğunu qeyd edirlər. Bununla belə, partiyanın liderlərindən Alis Vaydel ABŞ administrasiyası ilə əlaqələrin qorunmasının vacib olduğunu düşünür.
Məlumata görə, Fransada qarşıdan gələn prezident seçkiləri ərəfəsində də sağçı qüvvələr Tramp administrasiyası ilə açıq yaxınlıqdan yayınmağa çalışacaqlar.
Eyni zamanda, analitiklər Macarıstandakı seçkilərin nəticələrini Tramp üçün şəxsi siyasi zərbə kimi qiymətləndirirlər. CNN bildirir ki, Tramp administrasiyası seçki kampaniyasının son mərhələsində Orbanı dəstəkləmək üçün fəal səylər göstərib. Bloomberg isə qeyd edir ki, Orbanın məğlubiyyəti Trampı dəstəkləyən Amerikanı Yenidən Böyük Et hərəkatının mövqeyinə də təsir göstərə bilər.
Ümumilikdə, Avropada Trampa münasibətin dəyişdiyi və onunla siyasi yaxınlığın artıq əvvəlki kimi üstünlük hesab olunmadığı vurğulanır.
