Uçuş qorxusu geniş yayılsa da, yeni araşdırma havada səyahətin yerüstü nəqliyyatla müqayisədə daha təhlükəsiz olduğunu göstərir.
“Daily Mail”in məlumatına görə, alimlər müxtəlif nəqliyyat vasitələrinin yaratdığı ölüm risklərini müqayisə ediblər. Araşdırmanın nəticələrinə əsasən, eyni məsafəni avtomobil və ya yük maşını ilə qət etmək kommersiya təyyarəsində uçmaqdan yüzlərlə dəfə daha risklidir.
Embry-Riddle Aeronautical University-nin tədqiqatçıları 2016–2025-ci illər ərzində ABŞ-da kommersiya aviasiyasında qeydə alınan ölüm halları ilə bağlı məlumatları təhlil edib. Nəticələr digər nəqliyyat növləri, eləcə də bəzi istirahət və peşə fəaliyyətləri ilə müqayisə olunub.
Araşdırmada kommersiya aviasiyası ən təhlükəsiz nəqliyyat növü kimi qiymətləndirilib. Şərti olaraq təyyarə səfərinin ölüm riski 1 bal qəbul edildikdə, avtomobillə səyahət üçün bu göstərici 626 olub. Bütün avtomobil və digər yol nəqliyyatı vasitələri üzrə risk 674, qatarla səyahət zamanı isə 239 olaraq hesablanıb.
Motosiklet sürmək zamanı ölüm riski kommersiya təyyarəsində uçuşla müqayisədə 22 279 dəfə, velosiped sürərkən isə təxminən 12 min dəfə yüksək olub. Şəhərlərarası avtobuslarla səyahət də təyyarə uçuşundan təxminən doqquz dəfə riskli qiymətləndirilib.
Tədqiqatçılar uçuş riskini müxtəlif idman və istirahət fəaliyyətləri ilə də müqayisə ediblər. Nəticələrə görə, xizək və snoubord sürmək zamanı ölüm riski uçuşdan 73 dəfə, sualtı dalğıclıqda 180 dəfə, marafon qaçışında 202 dəfə, paraşütlə tullanma zamanı isə 422 dəfə yüksəkdir.
Alimlərin fikrincə, insanların nəqliyyat vasitələrinin təhlükəsizliyi ilə bağlı təsəvvürləri hər zaman real statistik göstəricilərlə üst-üstə düşmür. Nadir hallarda baş verən, lakin geniş işıqlandırılan təyyarə qəzaları ictimaiyyətdə uçuşların təhlükəli olması ilə bağlı daha güclü təsəvvür yarada bilər. Halbuki avtomobil qəzaları kimi daha çox rast gəlinən hadisələr gündəlik həyatın bir hissəsi olduğundan daha az diqqət çəkir.
Tədqiqat müəllifləri bildirirlər ki, heç bir fəaliyyət tamamilə risksiz deyil. Bununla belə, ABŞ-da kommersiya aviasiyası yüksək səviyyədə tənzimlənən və təhlükəsizlik standartlarının inkişaf etdirildiyi nəqliyyat sistemidir.
Araşdırmanın nəticələri göstərir ki, müasir kommersiya aviasiyasında uçuş riski son dərəcə aşağı səviyyədədir və təyyarə ilə səyahət avtomobil, motosiklet və velosiped kimi bir sıra digər nəqliyyat vasitələrindən əhəmiyyətli dərəcədə daha təhlükəsizdir.
