İran Müdafiə Nazirliyinin sözçüsü Rza Talay-Nik ABŞ və İsrail arasında yaşanan qarşıdurmaların beynəlxalq münasibətlər sistemində ciddi dəyişikliklərə səbəb olduğunu bildirib.
“Mehr” agentliyinin yaydığı məlumata görə, İran rəsmisi çıxışında ABŞ-ın qlobal hegemonluğunun zəiflədiyini iddia edib.
“Üçüncü məcburi müharibənin nəticəsi olaraq Amerikanın qlobal hegemonluğu çöküb. İran xalqı və silahlı qüvvələri istənilən təhdid və ya təcavüzə qətiyyətli cavab verməyə hazırdır”, – deyə Talay-Nik bildirib.
İran Müdafiə Nazirliyinin sözçüsü əlavə edib ki, ABŞ-ın birtərəfli siyasətinin sonu yaxınlaşır və dünya yeni beynəlxalq düzənə doğru dəyişir.
Onun sözlərinə görə, dünya artıq çoxtərəfli münasibətlər sisteminə istiqamətlənir və bu prosesdə İran xalqının müqaviməti mühüm rol oynayır.
Talay-Nik həmçinin 2026-cı il 28 fevral tarixində baş verdiyi bildirilən “Ramazan müharibəsi”nə istinad edərək, İranın müqavimətinin ABŞ-ın birtərəfli siyasətinə qarşı alternativ güc balansının formalaşmasına təsir etdiyini vurğulayıb.
