“France-Presse” agentliyinin verdiyi məlumata görə, İsrailin müdafiə naziri İsrael Katz bazar günü Baş nazir Binyamin Netanyahu ilə birlikdə Suriya tərəfindəki Hermon dağında İsrail əsgərlərini ziyarət edərkən İsrail qoşunlarının cənubi Suriyadakı təhlükəsizlik zonasını tərk etməyəcəyini bildirib.
“Biz buradayıq, Hermon dağındayıq, təhlükəsizlik zonasındayıq və buradan ayrılmayacağıq”, – deyə Katz səfər yerindən təxminən 35 kilometr aralıda, Dəməşqdəki sarayında olan Suriya prezidenti Əhməd əl-Şaraya müraciət edərək bildirib.
İsrail Müdafiə Nazirliyinin rəhbəri həmçinin İranı yeni zərbələrlə hədələyib. Onun qiymətləndirməsinə görə, İsrail artıq İrana iki dəfə zərbə endirib və lazım gələrsə, üçüncü dəfə zərbə endirəcək və təhdidlərin qarşısını almağa davam edəcək.
İsrail qüvvələri 2024-cü ilin dekabrında Bəşər Əsəd rejiminin devrilməsindən bəri Suriyanın cənubundakı sözdə təhlükəsizlik zonasında yerləşdirilib. İsrail 1974-cü ildən bəri BMT qüvvələri tərəfindən patrul edilən və İsrail tərəfindən işğal edilmiş Qolan təpələrində İsrail və Suriya qoşunlarını ayıran keçmiş bufer zonasını işğal edib.
Katz iki həftə əvvəl Suriyanın cənubundakı İsrail mövqelərinə baş çəkmişdi. O zaman Dəməşq onun səfərini pisləyərək, bu addımı “ölkənin suverenliyinin və ərazi bütövlüyünün kobud şəkildə pozulması” adlandırmışdı.
