ABŞ dövlət katibi Marco Rubio Ukraynadakı münaqişənin daha da eskalasiya edə biləcəyini bildirib. Vətəninfo.az xəbər verir ki, o, bu açıqlamanı Rusiyanın xarici işlər naziri Sergey Lavrov ilə telefon danışığından sonra verib.
Rubio qeyd edib ki, danışıq zamanı Rusiya tərəfi diplomatik nümayəndəliklərə Kiyevdə təhlükəsizlik risklərinin artdığı barədə xəbərdarlıq edib. ABŞ rəsmisinin sözlərinə görə, Moskva bütün səfirliklərə Ukrayna paytaxtının “son dərəcə təhlükəli” ola biləcəyi barədə məlumat verib.
“Bütün müharibələrdə əsas risk ondan ibarətdir ki, münaqişə davam etdikcə eskalasiya təhlükəsi artır. Bir tərəfin güclü hücumu qarşı tərəfdən daha sərt cavabla nəticələnə bilər”, – deyə Rubio bildirib.
ABŞ dövlət katibi vurğulayıb ki, Vaşinqton Ukrayna münaqişəsinin həlli istiqamətində diplomatik səyləri davam etdirməyə hazırdır.
Rusiya Xarici İşlər Nazirliyi də telefon danışığını təsdiqləyib. Bildirilib ki, Rusiya ordusunun Kiyevdə Ukrayna Silahlı Qüvvələrinin obyektlərinə endirdiyi zərbələr Moskvanın iddiasına görə, Rusiya ərazisində mülki obyektlərə qarşı hücumlara cavab xarakteri daşıyır.
Telefon danışığından sonra Qərb mediasında və sosial şəbəkələrdə müxtəlif reaksiyalar yaranıb. Kiprli jurnalist Aleks Kristoforu Lavrovun açıqlamalarının Kiyevdə ciddi narahatlıq doğurduğunu bildirib.
Bu arada, Luqansk vilayətinin Starobilsk şəhərində yerləşən kollec binasına endirilən zərbə regionda vəziyyəti daha da gərginləşdirib. Rusiya tərəfi hücum nəticəsində çoxsaylı insan itkisi olduğunu açıqlayıb və cavab tədbirlərinin hazırlanacağını bəyan edib.
Qərb ekspertləri isə yaxın günlərdə Ukraynada hərbi vəziyyətin daha da ağırlaşa biləcəyini istisna etmirlər.
