Rusiyada Tu-160 strateji bombardmançı təyyarəsinin Tu-160M standartına uyğun modernləşdirilmiş növbəti nümunəsi ortaya çıxıb. Təyyarənin görüntüləri aviasiya üzrə tədqiqatçı Pyotr Butovski tərəfindən paylaşılıb.
Vətəninfo.az xəbər verir ki, seriya nömrəsi 8-04 olan və “Pyotr Deinekin” adlandırılan bu təyyarə sınaq uçuşları həyata keçirir. Sözügedən bort, əvvəllər istehsal edilmiş Tu-160 təyyarələri arasında modernləşdirilərək Tu-160M versiyasına yüksəldilən altıncı nümunə hesab olunur.
Təyyarə ilk dəfə 2017-ci ilin noyabrında Kazan Aviasiya Zavodunda təqdim olunub və həmin ilin dekabrında ilk uçuşunu həyata keçirib. 2020-ci ildən etibarən isə burada Tu-160M standartına uyğun geniş modernləşdirmə işləri aparılıb və proses yaxın zamanda tamamlanıb.
Yenilənmə çərçivəsində təyyarəyə müasir avionika sistemləri, yeni elektron avadanlıqlar və təkmilləşdirilmiş silah sistemləri quraşdırılıb.
Məlumatlara əsasən, Rusiyanın hazırda müxtəlif modifikasiyalarda ümumilikdə 18 Tu-160 bombardmançı təyyarəsi mövcuddur. Onlardan yalnız təxminən 7-si aktiv döyüş tapşırıqlarında istifadə olunur.
Ekspertlər bildirir ki, bu göstərici donanmanın əməliyyat hazırlıq səviyyəsinin təxminən 40% təşkil etdiyini göstərir.
Rusiya Müdafiə Nazirliyi 2018-ci ildə “Tupolev” şirkəti ilə 2027-ci ilə qədər 10 ədəd yeni Tu-160M bombardmançısının istehsalı barədə müqavilə imzalayıb. Bu çərçivədə ilk eksperimental təyyarə 2022-ci ildə ilk uçuşunu həyata keçirib.
Eyni zamanda, Rusiyanın gələcəkdə bu təyyarələri yeni nəsil gizli bombardmançı – PAK DA ilə əvəz etməyi planlaşdırdığı bildirilir.
Qərb ekspertləri Tu-160 platformasının köhnə olduğunu və ilk uçuşunun 1981-ci ildə baş tutduğunu xatırladaraq, modernləşdirmə potensialının məhdud olduğunu vurğulayır.
Bundan əlavə, PAK DA layihəsinin illərdir gecikməsi və hələ də tam reallaşmaması Rusiyanın strateji aviasiya planlarına dair suallar doğurur.
