Türkiyədə müdafiə sənayesinin ən mühüm tədbirlərindən biri olan SAHA Expo 2026 çərçivəsində ölkənin indiyədək istehsal etdiyi ən böyük və ən uzun mənzilli raket – “Yıldırımhan” ictimaiyyətə təqdim olunub.
Vətəninfo.az xəbər verir ki, Türkiyə Milli Müdafiə Nazirliyi nəzdində fəaliyyət göstərən Tədqiqat və İnkişaf bölməsi tərəfindən hazırlanan raket Türkiyənin müdafiə texnologiyalarında yeni mərhələyə keçdiyini göstərir. İstanbul Sərgi Mərkəzində keçirilən beynəlxalq tədbirdə nümayiş olunan “Yıldırımhan” sərginin ən diqqətçəkən yeniliklərindən biri olub.
Texniki imkanları
Yeni raket qitələrarası zərbə qabiliyyətinə malik olmaqla Türkiyənin bu sahədə imkanlarını genişləndirir. Onun əsas xüsusiyyətləri belədir:
Uçuş məsafəsi: 6000 km
Sürət: Mach 9 – Mach 25 (hipersəs)
Yanacaq növü: maye azot tetroksid
Mühərrik sistemi: 4 güclü raket mühərriki
Dizayn və simvolika
Raketin gövdə dizaynı da xüsusi diqqət çəkir. Ağ rəngli korpus üzərində qızılı hərflərlə “Yıldırımhan” adı yazılıb. Gövdədə Osmanlı hökmdarı I Bəyazid tuğrası, burun hissəsində isə Mustafa Kamal Atatürk imzası yer alır.
Rəsmi açıqlama
Müdafiə naziri Yaşar Güler təqdimat zamanı bildirib ki, “Yıldırımhan” ölkənin ilk maye yanacaqla işləyən hipersəs raketidir və Türkiyənin indiyə qədər istehsal etdiyi ən uzaqmənzilli silah sistemidir.
Nazirin sözlərinə görə, yaxın gələcəkdə raketin sınaq atışlarına başlanılması planlaşdırılır.
