Ukraynanın uzunmənzilli pilotsuz uçuş aparatları (PUA) ilə həyata keçirdiyi hücumlar nəticəsində Rusiyanın ən iri neft emalı müəssisələrindən biri – Kirişi neft emalı zavodu fəaliyyətini dayandırıb. Vətəninfo.az xəbər verir ki, bu barədə Reuters agentliyi məlumat yayıb.
Məlumata görə, Leninqrad vilayətində yerləşən və rəsmi adı “Kirishinefteorgsintez” olan zavodda əsas emal qurğularından üçünün zədələnməsi istehsalın tam dayanmasına səbəb olub. CDU (xam neftin ilkin emalı qurğuları) zavodun əsas texnoloji hissəsi hesab olunur və onların sıradan çıxması müəssisənin işləməsini qeyri-mümkün edir.
Leninqrad vilayətinin qubernatoru Aleksandr Drozdenko bildirib ki, hücum nəticəsində zavodun sənaye zonasında yanğın baş verib. Reuters-ə danışan anonim mənbələr isə qeyd ediblər ki, dörd əsas CDU qurğusundan üçü dron zərbələri nəticəsində ciddi ziyan görüb.
Ukrayna tərəfi bu cür hücumları Rusiyanın müharibə iqtisadiyyatını zəiflətmək məqsədi daşıyan müdafiə addımı kimi qiymətləndirir. Rusiya isə bu hücumları terror aktı adlandırır.
Qeyd olunur ki, Ukrayna sərhədindən təxminən 800 kilometr məsafədə yerləşən Kirişi zavodu bu il ərzində bir neçə dəfə hücuma məruz qalıb. Zədələnmiş obyektlərin bərpası üçün tələb olunan vaxt isə hələlik məlum deyil.
İllik emal gücü 20 milyon ton olan müəssisə son illərdə orta hesabla 18 milyon ton neft emal edib. Bu isə Rusiyanın ümumi neft emalı həcminin təxminən 7 faizini təşkil edir. Zavod həm daxili bazar, həm də ixrac üçün əsas dizel yanacağı təchizatçılarından biri sayılır.
Son aylarda Ukrayna tərəfindən Rusiyanın enerji infrastrukturuna – boru kəmərləri, limanlar, neft emalı zavodları və tankerlər daxil olmaqla – intensiv hücumlar həyata keçirilir. Bu hücumların Rusiyaya milyardlarla dollar iqtisadi ziyan vurduğu bildirilir.
Bundan əvvəl də Rusiyanın müxtəlif bölgələrində yerləşən sənaye obyektlərinə zərbələr endirilib. Məsələn, Çeboksarı şəhərindəki zavodda partlayış və genişmiqyaslı yanğın qeydə alınıb. Eyni zamanda, Tuapse neft emalı zavodunun bərpasının təxminən 5 milyard dollara başa gələcəyi bildirilir.
Ekspertlərin hesablamalarına görə, martın sonu və aprelin əvvəlində Rusiyanın əsas neft terminallarına edilən hücumlar ölkəyə təxminən 2,2 milyard dollar həcmində itkiyə səbəb olub.
