Ukrayna Prezidenti Volodimir Zelenski ölkəsinin hazırladığı FREYJA hava hücumundan müdafiə sisteminin ilk sınaqlarının 2026-cı ilin sonuna qədər başlaya biləcəyini bildirib.
Vətəninfo.az xəbər verir ki, Zelenski bunu Norveçin müdafiə naziri Tore Sandvik, Norveç müdafiə şirkətinin baş direktoru Eirik Li və NASAMS hava hücumundan müdafiə sisteminin istehsalçı şirkətinin nümayəndələri ilə görüşdən sonra açıqlayıb.
Zelenski bildirib ki, Norveç Avropanın anti-ballistik müdafiə proqramı olan FREYJA layihəsində fəal iştirak edir. Onun sözlərinə görə, sistemin ayrı-ayrı komponentlərinin hazırlanması istiqamətində artıq ilkin nəticələr əldə olunub.
“Bu ilin sonuna qədər sınaqlara başlamaq üçün hansı işləri sürətləndirə biləcəyimizi və bunun üçün nə etməli olduğumuzu müəyyən etdik”, – deyə Zelenski bildirib.
Ukrayna Prezidenti həmçinin yeni peyk rabitəsi imkanlarının yaradılması istiqamətində işlərin başlanmasının müzakirə edildiyini qeyd edib. O, bu layihəyə dəstək göstərə biləcək tərəfdaşların prosesə cəlb olunacağını vurğulayıb.
FREYJA Ukraynanın tərəfdaş ölkələrlə birlikdə hazırladığı anti-ballistik müdafiə layihəsidir. Layihənin əsas məqsədlərindən biri Ukraynanın uzaqmənzilli hava hücumundan müdafiə imkanlarını gücləndirməkdir.
Zelenski daha əvvəl də FREYJA layihəsinin ilk nəticələrinin 2026-cı ildə əldə ediləcəyinə ümid etdiyini açıqlamışdı.
“The Economist”in yazdığına görə, layihənin hazırlanmasında əsas məqsədlərdən biri ABŞ istehsalı olan “Patriot” sistemlərinə alternativ yaratmaqdır. Nəşr FREYJA üçün daha aşağı qiymətli raketlərin hazırlanmasının nəzərdə tutulduğunu qeyd edib.
Məlumata görə, layihə çərçivəsində bir raketin qiymətinin təxminən 700 min dollar olması hədəflənir. Bununla belə, analitiklər sistemin tam əməliyyat hazırlığına ən yaxşı halda 2028-ci ildə çata biləcəyini bildirirlər.
Hazırda Ukraynanın hava məkanının qorunmasında ABŞ istehsalı “Patriot” sistemləri mühüm rol oynayır. FREYJA layihəsinin uğurla reallaşması isə Kiyevin hava hücumundan müdafiə sahəsində xarici sistemlərdən asılılığını müəyyən qədər azaltmaq imkanı yarada bilər.
Zelenski görüş zamanı Ukraynanın Rusiya raket və pilotsuz uçuş aparatlarının hücumlarından qorunması üçün əlavə müdafiə dəstəyinə ehtiyac olduğunu da vurğulayıb. O, gələn ay Norveçdən yeni müdafiə yardım paketinin alınacağına ümid etdiyini bildirib.
