2016-cı ildən bəri ənənəvi olaraq 21 km (yarımarafon) məsafədə keçirilən Bakı Marafonu, 2026-cı il mayın 3-də ilk dəfə 42 km məsafədə təşkil olunacaq.
Bu, Bakının artıq peşəkar “Full Marathon” şəhərləri siyahısına daxil olması deməkdir. 21 km hər kəs üçün bir sınaq idisə, 42 km artıq dözümlülük və xüsusi hazırlıq tələb edən peşəkar qaçışçı auditoriyasına hesablanıb.
Sfera.az xəbər verir ki, 2016-cı ildə cəmi 7 min iştirakçı ilə başlayan “Küləyə qalib gəl” marafonunun populyarlığı illər keçdikcə inanılmaz bir sürətlə artıb. 2023-cü ildə 20 min nəfəri ötən iştirakçı sayı, ötən il rekord vuraraq 28 minə yaxınlaşıb. 42 km-lik yeni format isə bu kütləviliyi peşəkarlıqla birləşdirir. Dünyada Nyu-York, London və Berlin kimi meqapolislərin öz marafonları ilə yaratdığı brend imici indi Bakıya keçib.
42 km-ə keçidin önəmi sadəcə məsafə deyil, Bakı rəsmən “Full Marathon” statuslu şəhərlər siyahısına daxil olub. Dünyada “marafon turisti” adlanan xüsusi bir kütlə var və onlar yalnız 42 km-lik yarışlar üçün ölkə-ölkə gəzirlər. Bu yarış, Bakıya minlərlə xarici qonağın, media nümayəndəsinin və investorun gəlməsi deməkdir. 42 km-i hər kəs qaçmır. Bu məsafə xüsusi iradə, aylarla davam edən hazırlıq və dözümlülük tələb edir. Bu il iştirakçıları möhtəşəm bir marşrut gözləyir. Əvvəllər start və finiş Bayraq Meydanında və ya Olimpiya Stadionunda idisə, bu ilki 42 km-lik marşrut Bakının demək olar ki, bütün sahil və mərkəzi hissələrini əhatə edir. Belə ki, marafonun start xətti Dövlət Bayrağı Meydanından başlayaraq şəhərin müasir və tarixi simasını əhatə edəcək.
Marafonun son nöqtəsinin “Sea Breeze” istirahət mərkəzi olması həm qaçışçıların yorğunluğunu dəniz havası ilə çıxarmasına, həm də paytaxtın turizm potensialının şəhər kənarına doğru genişlənməsinə xidmət edir. Bakı Marafonu artıq sadəcə yerli bir qaçış deyil, beynəlxalq platformadır. 2025-ci ilin qalibləri arasında Türkiyə və Ukrayna idmançılarının olması bunun sübutudur. 2026-cı ildə mükafat fondu da kifayət qədər cəlbedicidir. Belə ki, 1-ci yer 6,000 AZN, 2-ci yer 4,000 AZN, 3-cü yer isə 2,000 AZN ilə mükafatlandırılacaq. Bu tip irimiqyaslı tədbirlər həm də şəhərin infrastrukturunun və xidmət sektorunun (otellər, restoranlar, nəqliyyat) canlanmasına birbaşa təsir edir.
Həmçinin, marafonlar adətən “yaşıl dünya” və ekoloji təmiz nəqliyyatı təşviq edir. Minlərlə insanın maşınlardan imtina edib qaçması şəhərin ekoloji ruhuna müsbət təsir göstərir və “Dayanıqlı İnkişaf” məqsədlərinə xidmət edir. Ona görə də Azərbaycanın bu kimi layihələrə ev sahibliyi etməsi ölkənin beynəlxalq arenada nüfuzunu daha da artırmağa xidmət edir.
