Son illər Avropaya qaçan şəxlərin “bloger” olması adi hala çevrilib. Asan və rahat pul qazanmaq yolunu seçənlər bunu kimlərisə canlı yayımda təhqir etməklə həyata keçirirlər. Onlar canlı yayımlarda dövlət əleyinə şüarlar səsləndirməklə olmayan problemləri gündəmə gətirməklə gündəmdə olduqlarını nümayiş etdirmək istəyirlər. Son günlər isə bəzi üzəniraq “bloger”lərin iç üzü ifşa olunur. Bu dəfə onları hansısa jurnalist və yaxud araşdırmaçı yox, özləri-özlərini ifşa ediblər.
Jurnalist Əfqan Muxtarlı Avropada olan və söyüş müxalifəti kimi təqdim edilən şəxslərin bəzi məmurlar tərəfindən maliyyələşdirildiyini açıqlayıb. Əfqan Muxtarlı konkret olaraq Tural Sadıqlının Azərbaycanın tanınmış məmurları tərəfindən maliyyələşdirildiyini açıqlayıb. Bu iddia onu deməyə əsas verir ki, Avropa paytaxtlarında qala bilmək, qondarma “mühacir ömrünü” uzatmaq üçün Azərbaycana qarşı bütün siyasi oyunlarda iştirakçı olan “söyüş müxalifəti” daxilində ifşa prosesi başlayıb. Qarşılıqlı ittihamlardan bəlli olur ki, guya təqib olunan və buna görə “mühacir” etmiş bu kəslər “demokratiya”, “insan haqları” kimi məsələlərin arxasına sığınaraq, şantaj yolu ilə pul qazanır və bir çox hallarda hakimiyyət daxilində hansısa oliqarx məmurun sifarişlərini yerinə yetirirmiş. Əslində “söyüş müxalifəti”nin ən “parlaq” dövründə – 2018-2019-cu illərdə onların sifariş yerinə yetirdiyi, həm xaricdəki antiazərbaycan qüvvələrə, həm də ölkə daxilində müəyyən qruplara işlədiyinə dair fikirlər vardı. İndi bu, özlərinin çəkişməsində faktlarla ortaya çıxır.
“Bloger” olduğunu iddia edən Tural Sadıqlı bildirib ki, hakimiyyətlə bağlı problemlər daxili məsələdir və şikayəti əcnəbilərə yox, hakimiyyət nümayəndəsinə etməliyik. Bu, “söyüş müxalifəti”ndə səslənən ilk normal fikir kimi qəbul edilə bilər, lakin bu fikrin Tural Sadıqlı tərəfindən səslənməsi suallar yaradır. Axı o, sırf Avropa paytaxtlarında qalmaq üçün erməni diasporu ilə belə əməkdaşlıq etməyə hazır olduğunu bəyan etmiş şəxsdir, o zaman bu tranformasiyanın səbəbi nədir?! Məhz səbəb axtarışı “söyüş müxalifəti”nin bir-birini ifşa etməsi ilə nəticələndi.
T.Sadıqlının “çevrilməsi”nin səbəbləri eyni qrupun digər bir üzvü Surxay Lətifovun sosial şəbəkə hesabında yazdıqları fonundan aydın olur. S.Lətifov yazır ki, Almaniya prokurorluğu konkret faktlar əsasında Almaniyada olan azərbaycanlı blogerlərə qarşı araşdırma başlayıb: “Məsələ bundadır ki, həmin blogerlər müxtəlif dövrlərdə şantaj yolu ilə azərbaycanlı məmurlardan 500 min avro pul alıblar. Pulvermə prosesi isə Azərbaycan DTX tərəfindən sübutlarla rəsmiləşdirilib Almaniya prokurorluğuna verilib. İndi prokurorluğa çağırılıb bir-bir ifadə verirlər. Daha çox hansısa Tural Sadıqlı adlı blogerin adı hallanır”.
Almaniyada yaşayan Əfqan Muxtarlı da məsələ haqda yazıb. Bildirib ki, Azərbaycan hakimiyyəti Avropda olan bəzi blogerlərin şantaj yolu ilə məmurlardan pul aldıqları barədə sübutları Almaniya və digər ölkələrin prokurorluqlarına təqdim edib: “Hətta deyilənə görə bir bloger şantaj yolu ilə 270 min avro alıb. Əlimdə konkret sənədlər olmadığı üçün ad çəkə bilmirəm. Amma Almaniya prokurorluğuna göndərilən sorğuma cavab gələn kimi dərc edəcəm. Bax, şantaj etmək yalnız səhv deyil, həm də cinayətdir. Xüsusən Avropada bunu bağışlamırlar. Həm də inanmıram ki, Almaniya bazarlığa gedə, Azərbaycan hökuməti iddiadan geri çəkilsə, almanlar işi bağlaya. Bağlamazlar”.
Bu açıqlamardan məlum olur ki, indiyə qədər Azərbaycana qarşı söyüşlər hesabına Avropa paytaxtlarında “yaşamaq hüququ” alan bu kəslərin sonu çatıb. Artıq Almaniya onların hüquqi müstəvidə ifşasına başlayıb və “söyüş müxalifəti”nin bir çox üzvü ən yaxşı halda deportasiya olunacaqlar. Bunu bilən Tural Sadıqlı da “problemləri hakimiyyət nümayəndəsinə deməliyik” çıxışı ilə indidən özünü sığortalamağa çalışır.
Əfqan Muxtarlının yazdıqlarından isə yeni faktlar ortaya çıxıb.
1. Almaniyada istintaqdan qaçan “söyüş müxalifəti”nin üzvləri var, lakin onların Azərbaycana qayıdışına da icazə verilmir;
2. “Söyüş müxalifəti”nin üzvləri arasında hansısa məmurla (ad çəkilmir) əməkdaşlıq edənlər olub;
3. “Söyüş müxalifəti”nə məlumat ötürən şəxslər elə məlumatı verdiyi şəxslər tərəfindən pul müqabilində – 5-10 min avroya satılıb;
4. “Söyüş müxalifəti” Azərbaycanda hansısa məmurun sifarişi ilə digər məmurlara qarşı qarayaxma kampaniyası aparıb;
Tural Sadıqlı isə Əfqan Muxtarlı başda olmaqla onun haqqında danışanların hamısını “Azərbaycan hakimiyyətinin adamı” adlandırıb, hətta Əli Kərimli və İsa Qəmbərin də ona qarşı prosesdə maraqlı olduğunu iddia edib.
Əfqan Muxtarlı da Tural Sadıqlıya cavabında onun hansısa məmurla görüşdüyü iddia edib.
“Sual verirəm, sən, Tural Avropada hansı Azərbaycan məmuru ilə görüşüb dərdləşirsən? Kimdir o məmur? Nə danışırsız? Müxalifətci, özü də Əliyevi sərt şəkildə tənqid və təhqir edən birini nə əcəb Azərbaycan məmuru qəbul edir? Nəyin müqabilində?” – Muxtarlı yazır.
“Söyüş müxalifəti”nin daxili qarşıdurması və bir-birini ifşa etməsində əsas diqqətçəkən məqam Azərbaycanda hansısa məmurların bu şəxslərdən hansısa məqsədlə üçün istifadə etməsidir. Əslində yaxın keçmişdə “söyüş müxalifəti”nin fəaliyyətinə nəzər yetirdikdə bu ehtimal həmişə ön planda idi. Çünki onların açıqladığı faktlar və yaydıqları məlumatlar sıradan deyildi, bunların “içəridən ötürüldüyü” aydın görünürdü. Hətta mediada konkret adları çəkilən məmurlar da vardı. Misal üçün, Ramiz Mehdiyev, Eldar Həsənov, Eldar Mahmudov və digərlərinin “söyüş müxalifəti”nə informasiya ötürdüyü, onlardan daxildə “rəqib” kimi gördüyü məmurlara qarşı istifadə etdiyi haqda məlumatlar olub.
Hərçənd, Azərbaycanda aparılan kadr islahatlarından sonra, xüsusilə 2020-ci ildə bu məsələlərə son qoyulduğu görünürdü. Mediada aparılan islahatlar və şəffaflığın təmin edilməsi də “söyüş müxalifəti”ni “çörəksiz” qoymuşdu. Əfqan Muxtarlı və Tural Sadıqlının qarşıdurması, səsləndirdikləri ittihamlar isə hansısa məmurun, yaxud məmurların hələ də “köhnə üsullar”dan istifadə etdiyinə dair şübhələr yaratdı. Onlarla əməkdaşlıq edən məmurlar kimlərdir, bu məmurların məqsədi nədir, informasiyanı hansı formada ötürürlər?
Bu, cavabsız qalan suallardır. Keçmiş təcrübə göstərir ki, bu halın davam etməsi təkcə hakimiyyət üçün yox, dövlət üçün də təhlükə yaradır. Çünki “söyüş müxalifəti” xaricdə erməni diasporu/lobbisi də daxil olmaqla antiazərbaycan dairələrin əlində alətə çevrilib. Hansısa məmurun hansısa marağı üçün onlarla əməkdaşlıq etməsi birbaşa dövlətə qarşı atılan addımdır. Və istisna deyil ki, Muxtarlı ilə Sadıqlının qarşıdurmasında ortaya çıxan nüanslar yaxın zamanda həmin məmurların da ifşasına səbəb olacaq.
Nahid Canbaxışlı
