Vətəninfo.az xəbər verir ki,Türkiyənin əsas müxalifət partiyası olan Cümhuriyyət Xalq Partiyası (CHP) ilə bağlı bu gün -21 may 2026-cı il tarixində Ankarada vacib və gözlənilməz bir məhkəmə qərarı qəbul edilib.
Ankara Regional Apellyasiya Məhkəməsinin 36-cı Mülki Palatası, CHP-nin 2023-cü ildə keçirilmiş qurultayının (38-ci Qurultay) nəticələrini “mütləq batil” (hüquqi cəhətdən etibarsız) hesab edərək ləğv edib.
Məhkəmənin bu qərarı ilə hazırkı sədr Özgür Özəl və onun rəhbərlik etdiyi komanda vəzifələrindən müvəqqəti olaraq kənarlaşdırılıb. Məhkəmə, partiyanın keçmiş sədri Kamal Kılıçdaroğlu və onun qurultaydan əvvəlki idarəetmə heyətinin rəhbərliyə geri qayıtmasına dair müvəqqəti tədbir görülməsinə qərar verib.
Qeyd edək ki, Məhkəmə iddiası 2023-cü ilin noyabrında keçirilən qurultayda “səsvermə zamanı pozuntular” və “səslərin satın alınması” kimi iddialara əsaslanıb. İlkin mərhələdə Ankara 42-ci Mülki Məhkəməsi işin əsassız olduğunu bildirərək rədd etsə də, apellyasiya məhkəməsi şikayəti təmin edərək qərarı dəyişib.
Bu qərar Türkiyə siyasi gündəmini və maliyyə bazarlarını ciddi şəkildə silkələyib. Xəbərin yayılmasından dərhal sonra İstanbul Birjasında (BIST 100) səhmlər 6%-dən çox dəyər itirib və ticarət müvəqqəti olaraq dayandırılıb. Partiya rəhbərliyi qərarı tanımadıqlarını bəyan edib və tərəfdarlarını Ankaradakı qərargah qarşısında etirazlara çağırıb. Bir sıra ekspertlər və beynəlxalq müşahidəçilər bu hadisəni, 2024-cü ildə keçirilən bələdiyyə seçkilərində böyük qələbə qazanmış CHP-yə qarşı aparılan hüquqi təzyiqlərin bir hissəsi kimi qiymətləndirirlər.
