Tayvan ordusu iyunun 10-da genişmiqyaslı döyüş atışlı təlimlər keçirərək ABŞ istehsalı olan HIMARS yüksək mobillikli raket sistemlərindən ilk dəfə Tayvan boğazı istiqamətində raket buraxılışı həyata keçirib.
Vətəninfo.az xəbər verir ki, bu, HIMARS sistemlərinin Tayvan boğazında ilk döyüş atışlı sınağı hesab olunur. Rəsmi Taybey təlimlərin ölkənin müdafiə imkanlarının gücləndirilməsinə və mümkün xarici təhdidlərə qarşı hazırlığın artırılmasına xidmət etdiyini bildirib.
Tayvan ordusunun nümayəndəsi Vanq Minhui çıxışında ölkənin təhlükəsizlik mühitinin mürəkkəbləşdiyini qeyd edərək, hərbçilərin HIMARS sistemlərinin tətbiqi üzrə hazırlıqlarını davam etdirəcəyini vurğulayıb.
“Cari təhlükələri nəzərə alaraq, ölkəmizin müdafiəsini təmin etmək məqsədilə HIMARS sistemləri ilə təlimləri qətiyyətlə davam etdirəcəyik”, – deyə o bildirib.
Tayvan Müdafiə Nazirliyinin açıqlamasına görə, təlimlər zamanı azaldılmış mənzilli raketlərdən istifadə olunub. Buraxılan raketlər sahil sularına düşüb və boğazın uzaq hissələrinə çatmayıb.
Son illərdə Çin və Tayvan arasında münasibətlərdə gərginlik davam edir. Pekin Tayvanı öz ərazisinin ayrılmaz hissəsi hesab edir və adanın gələcəkdə materik Çinlə birləşdirilməsinin mümkün variantlarından biri kimi hərbi gücdən istifadə ehtimalını istisna etmir.
Buna cavab olaraq Tayvan müdafiə qabiliyyətini artırmağa çalışır. ABŞ rəsmi olaraq Tayvanı müstəqil dövlət kimi tanımasa da, adanın əsas silah təchizatçılarından biri olaraq qalır və bölgədə status-kvonun güc yolu ilə dəyişdirilməsinə qarşı olduğunu bəyan edir.
Məlumata görə, Vaşinqton 2025-ci ilin sonunda Tayvana əlavə 82 HIMARS sistemi satmağı planlaşdırıb. Bununla belə, bəzi media orqanları ABŞ və Çin liderləri arasında keçirilən son görüşlərdən sonra bu müqavilənin taleyinin qeyri-müəyyən olduğunu yazır.
Bölgədə gərginlik Çinin iyunun əvvəlində Tayvanın şərqində yerləşən sularda xüsusi dəniz əməliyyatına başlamasından sonra daha da artıb. Pekin bu addımın məqsədinin gəmiçilik fəaliyyətinə nəzarətin gücləndirilməsi və milli maraqların qorunması olduğunu bildirib.
Eyni zamanda, Çin mediası Tayvan istiqamətində fəaliyyət göstərən hərbi bölmələrin yeni HQ-16F hava hücumundan müdafiə raketləri ilə təchiz olunduğunu xəbər verib. Məlumatlara görə, həmin sistemlərin imkanları ABŞ-ın Patriot PAC-2 və PAC-3 kompleksləri ilə müqayisə edilir.
