Ukrayna Silahlı Qüvvələri Rusiyanın Perm şəhərində yerləşən iri neft emalı zavoduna, eləcə də Volqoqrad vilayətindəki hərbi aerodroma zərbələr endirib.
Vətəninfo.az xəbər verir ki, Ukrayna Prezidenti Volodimir Zelenski bildirib ki, Ukrayna PUA-ları Rusiyanın dərinliklərində yerləşən bir sıra mühüm hərbi və enerji obyektlərini hədəfə alıb.
Avqustun 21-də səhər saatlarında Rusiyanın Perm şəhərinə pilotsuz uçuş aparatları ilə hücum edildiyi bildirilib. Yerli media və Telegram kanalları şəhərdə partlayış səslərinin eşidildiyini və hava hücumu sirenlərinin işə düşdüyünü yazıb.
Perm diyarının regional təhlükəsizlik qurumları PUA hücumunun dəf edildiyini açıqlayıb. Eyni zamanda, “Rosaviasiya” Perm hava limanında təyyarələrin gəlişi və yola düşməsinə müvəqqəti məhdudiyyətlərin tətbiq edildiyini bildirib.
Bundan sonra şəhər üzərində böyük tüstü sütununun yüksəldiyini göstərən görüntülər yayılıb. OSINT analitikləri hücumun “Lukoil-Permnefteorgsintez” neft emalı zavoduna (PNOS) dəydiyini bildiriblər.
Zavod Rusiyanın iri neft emalı müəssisələrindən biridir. Müəssisə ildə 13 milyon tondan çox xam neft emal etmək gücünə malikdir. Burada benzin, dizel yanacağı, aviasiya kerosini və müxtəlif növ sürtkü materialları istehsal olunur.
Müəssisə həm Rusiya daxili bazarının, həm də ixrac bazarlarının yanacaqla təmin edilməsində mühüm rol oynayır.
“Lukoil-Permnefteorgsintez” daha əvvəl də PUA hücumlarının hədəfinə çevrilib. Məlumata görə, mayın 7-də baş verən hücum zamanı zavodun yanacaq çənlərindən altısı tamamilə sıradan çıxıb.
Ukrayna Prezidenti Volodimir Zelenski Permdəki neft emalı zavoduna hücumu təsdiqləyib. Onun sözlərinə görə, zavod Ukrayna sərhədindən 1 600 kilometrdən çox məsafədə yerləşir.
Zelenski həmçinin Volqoqrad vilayətindəki Marinovka hərbi aerodromunun da Ukrayna PUA-larının hədəfi olduğunu açıqlayıb.
Ukrayna prezidentinin sözlərinə görə, Qara dəniz istiqamətində də müəyyən nəticələr əldə edilib. Lakin o, bu əməliyyatla bağlı əlavə detallar açıqlamayıb.
Zelenski bildirib ki, Ukraynanın əvvəlki zərbələri nəticəsində Rusiyanın Su-34 qırıcı-bombardmançı təyyarəsi də zədələnib.
Onun sözlərinə görə, təyyarə cəbhə xəttindən təxminən 600 kilometr məsafədə yerləşən Axtubinsk aerodromunda zədələnib.
Bundan başqa, Primorsko-Axtarsk şəhərində Rusiyanın Ukraynaya qarşı istifadə etdiyi hücum PUA-larının saxlanması, hazırlanması və buraxılması üçün istifadə olunan obyektin vurulduğu bildirilib.
Zelenski bu zərbələri Ukraynanın Rusiyanın hərbi potensialına qarşı həyata keçirdiyi uzaqmənzilli əməliyyatların bir hissəsi kimi qiymətləndirib.
“Uzaqmənzilli sanksiyalarla” Ukraynanın müharibənin nəticələrini Rusiyanın öz ərazisinə qaytardığını deyən Zelenski bu cür əməliyyatların davam etdiriləcəyinə işarə edib.
Ukraynanın Rusiya ərazisindəki neft emalı müəssisələrinə və yanacaq infrastrukturuna hücumları ölkədə yanacaq təchizatı ilə bağlı problemləri də artırıb.
Avqustun əvvəlindən Rusiyanın müxtəlif bölgələrində yanacaqdoldurma məntəqələrində uzun növbələrin yarandığı, bəzi ərazilərdə isə benzin satışına məhdudiyyətlərin tətbiq edildiyi barədə məlumatlar yayılıb.
Moskvanın yanacaq təminatını sabitləşdirmək üçün Rusiyanın şərqindən gələn yanacaq həcmlərini yenidən bölüşdürməyə çalışdığı bildirilir. Buna baxmayaraq, paytaxtdakı bəzi yanacaqdoldurma məntəqələri də yanacaq satışına məhdudiyyətlər tətbiq edib.
Ukraynanın Rusiya ərazisinin dərinliklərində yerləşən enerji və hərbi obyektlərə zərbələri Moskvanın hava hücumundan müdafiə imkanları və ölkənin enerji təhlükəsizliyi ilə bağlı yeni suallar yaradıb.
