Finlandiya və İsveçin NATO-ya daxil olması uzun illər Avropanın təhlükəsizlik mənzərəsini dəyişəcək və Rusiya ilə münasibətləri gərginləşdirəcək.
“The Washington Post”un yazdığı kimi, Şimali Avropa ölkələrinin üzvlüyü Litva, Latviya və Estoniyaya əlavə müdafiə təmin edəcək.
Baltik dənizinin mərkəzində İsveçin Qotland adası da var. Keçən il Stokholm kazarmaların genişləndirilməsi də daxil olmaqla, orada qoşun topladığını elan etdi.
Ölkələrin üzv olması NATO-nun Arktikada mövcudluğunun güclənməsi deməkdir. Şimal Buzlu Okeanın sahillərinin 50%-dən çoxu Rusiya ərazisində yerləşdiyindən, Moskva bu məqamı daxili təhlükəsizlik məsələsi kimi nəzərdən keçirəcək.
İsveç və Finlandiya Kola yarımadasında yerləşən Rusiya sualtı qayıqlarının fəaliyyətinə nəzarət etməyə kömək edə bilər. Arktikanın daha çox mübahisəli əraziyə çevriləcəyi qorxusu var. Rusiyanın NATO ilə sərhədi də demək olar ki, ikiqat artacaq.
