image-nazim-rovsen-veteninfobackend

Nazim İbrahimovun ifadəsi generalı 15 il həbsə yollaya bilər

image-reklam_sirab_01

Ukraynada azərbaycanlı iş adamını öldürməkdə ittiham olunan general-leytenant Rövşən Əkbərovun cinayət işi üzrə Bakı Hərbi Məhkəməsində proses davam etdirilir. Cinayət işi üzrə ibtidai istintaq zamanı şahid qismində dindirilən şəxslərdən biri də Diasporla İş üzrə Dövlət Komitəsinin sabiq rəhbəri Nazim İbrahimov olub. İş üzrə hələ 2003-cü ildə dindirilən Nazim İbrahimov ifadəsində Elçin Əliyevi 1994-cü ildən tanıdığını, həmin vaxtlar özü də Kiyevdə sahibkarlıqla məşğul olduğunu deyib.

Bildirib ki, Elçin Əliyevlə münasibətləri yaxşı olub, ailəvi dostluq ediblər. Nazim İbrahimov ifadəsində göstərib ki, 1997-ci ildə Ukraynaya səfir vəzifəsinə təyin ediləndən sonra Elçin Əliyev həm yaxın dostu, həm də azərbaycanlı kimi səfirliyin texniki təminatında iştirak edib, hətta özünə məxsus “Ford Mustang” markalı avtomobilini də müvəqqəti səfirliyin istifadəsinə verib. Səfirliyin təminatla bağlı olan problemləri qısa müddət ərzində həll olunduqdan sonra Elçin Əliyevin avtomobili özünə geri qaytarılıb. Bununla yanaşı Kiyev şəhəri, Qluboçiskaya küçəsi 24 ünvanında yerləşən, Nazim İbrahimov və E.Əliyevin ofis kimi icarəyə götürdükləri 2 mərtəbəli bina səfirlik tərəfindən rəsmi qaydada Ukrayna dövlətindən alınıb. 2000-ci ilin avqust ayında Milli Məclisə keçirilən seçkilərlə bağlı Bakıya qayıdıb və 1 iyun 2001-ci ilədək Kiyev şəhərinə getməyib. Nazim İbrahimovun ifadəsinə görə, Rövşən Əkbərovla şəxsi tanışlığı olmayıb, onu yalnız Azərbaycanın Milli Qəhrəmanı və Müdafiə Nazirliyinin generalı kimi qiyabi olaraq mətbuatdan tanıyıb. Dostu Elçin Əliyevin öldürüldüyünü ona mərhumun biznes ortağı Səməd Novruzov zəng vurub deyib. Təyyarəyə bilet alıb birlikdə Kiyevə yola düşüblər, birbaşa morqa gediblər. Ekspert həkim onlara Elçin Əliyevin ürəyindən bıçaqlandığını söyləyib: “Oradan çıxıb milis idarəsinə getdik. Elçin Əliyevlə əlaqəsi olan şəxsləri dindirirdilər. Səfirliyin komendantı Qüdrət Əhmədov Rövşən Əkbərovun mənimlə görüşmək istədiyini dedi. Mən də razılaşdım. Həmin vaxt “Dnepr” hotelində qalırdım. Rövşən Əkbərov qaldığım hotelin foyesinə gəldi”.

Nazim İbrahimovun ifadəsinə görə, dostunun general tərəfindən qətlə yetirildiyini Rövşən Əkbərovun şəxsən özündən eşidib. Hətta tək özü deyil,  onların yanında olan Qüdrət Əhmədov da bu deyilənləri eşidib. İfadəsində Rövşən Əkbərovla təklikdə görüşmədiyini, Qüdrət Əhmədovun da onların yanında olduğunu bildirib. Rövşən Əkbərov görüş zamanı Nazim İbrahimova hadisə baş verən gecə səfirlikdə keçirilmiş qonaqlıqdan sonra adını xatırlamadığı bir nəfərlə “Sikora” kafesinə getdiyini, Elçin Əliyevlə və Məzahir Şıxaliyevlə bir stolda oturduqlarını, aralarında hansısa kobud rəftara görə mübahisə yarandığını, Məzahiri yumruqla, Elçini isə bıçaqla vurduğunu danışıb.

image-rovsen-veteninfo

Nazim İbrahimovun mətbuat səhifələrinə qədər gəlib çatan ifadəsində Rövşən Əkbərovun Elçin Əliyevi hansı səbəbə görə bıçaqla vurduğu bilinmir. Rövşən Əkbərovun cinayətlə bağlı Nazim İbrahimova və onun yanında olan komendant Qüdrət Həsənova dedikləri məhkəmənin gedişatında nəyi dəyişə bilər? Üstündən 18 il keçib bu ifadənin. Nə kimi hüquqi təsiri ola bilər?

Veteninfo.az xəbər verir ki, “Bakı” Hüquq Şirkətinin rəhbəri Natiq Ələsgərov “Yeni Müsavat”a deyib ki, cinayət Ukraynada baş verdiyinə görə Azərbaycan Cinayət Məcəlləsinin 12-ci maddəsinin 1-ci bəndinə əsasən, Azərbaycan Respublikasının vətəndaşları və Azərbaycanda daimi yaşayan vətəndaşlığı olmayan şəxslər ölkənin hüdudlarından kənarda törətdikləri əmələ (hərəkət və ya hərəkətsizliyə) görə Azərbaycan Cinayət Məcəlləsi əsasında cinayət məsuliyyətinə cəlb edilməlidirlər: “Azərbaycan Respublikası Cinayət Məcəlləsinin 120.2.2-ci(xuliqanlıq niyyəti ilə qəsdən adam öldürmə) maddəsinə əsasən, irəli sürülmüş ittiham təsdiqini taparsa, Rövşən Əkbərov 15 ilə qədər azadlıqdan məhrum edilə bilər. Nazim İbrahimovun ifadəsi hakim tərəfindən əsas götürülə bilər. Gərək həmin ifadəni Nazim İbrahimov məhkəmədə də təsdiq etsin. 3-cü şəxs də məhkəməyə dəvət olunub ifadəsi alınmalıdır”.

Hüquqşünas deyib ki, mətbuatda Nazim İbrahimovun bu iş üzrə məsuliyyətə cəlb edilə bilməsi haqda məlumatların heç bir əsası yoxdur: “Nazim İbrahimov olay baş verəndən sonra dindirilib və bildiklərini istintaqçılarla bölüşüb. Onun cinayət məsuliyyətinə cəlb edilməsi üçün hər hansı bir əsas yoxdur. Əsas olsaydı belə, artıq istintaqa cəlbetmə müddəti keçdiyi üçün ona irəli sürülmüş ittiham üzrə cəzadan azad olunmalıdır”.
Hüquqşünas Nazim İbrahimovun Rövşən Əkbərovu cinayətdən sonra Ukraynadan Azərbaycana qaçırması haqda iddialar doğru olacağı halda istintaqa cəlb edilə biləcəyini deyib.
Baş Prokurorluğun ehtiyatda olan general-leytenant Rövşən Əkbərovun həbsi ilə bağlı yaydığı məlumatda bildirilir ki, o, Azərbaycan vətəndaşı, 1971-ci il təvəllüdlü Elçin Fəday oğlu Əliyevi 1 iyun 2001-ci il tarixdə Ukrayna Respublikasının paytaxtı Kiyev şəhərində soyuq silahla qəsdən öldürməkdə ittiham olunur.

31.05.2001-ci il tarixdən 1 iyun 2001-ci il tarixə keçən gecə Kiyev şəhəri, Deqtyaryov küçəsi 7 ünvanda yerləşən “Sikora” kafesində yeyib-içdikdən sonra, saat təxminən 2-3 radələrində həmin kafenin yaxınlığında Elçin Fəday oğlu Əliyevlə aralarında yaranmış cüzi münaqişə səbəbindən xuliqanlıq niyyəti ilə onun ürək nahiyəsinə kəsici-deşici predmetlə xəsarət yetirərək sonuncunun qəsdən öldürməsinə şübhələr üçün əsaslar müəyyən edilib.
15 mart 2021-ci il tarixdə Rövşən Əkbərov CM-in 12.1, 120.2.2 (qəsdən adam öldürmə) və 12.1, 221.3-cü (xuliqanlıq) maddələri ilə təqsirləndirilən şəxs qismində cəlb edilməklə, ona həmin maddələrlə ittiham elan edilmiş və Baş Prokurorluğun təqdimatına əsasən Bakı Hərbi Məhkəməsinin həmin tarixli qərarı ilə barəsində həbs-qətimkan tədbiri seçilib. Hazırda Rövşən Əkbərovun cinayət işi üzrə proses davam etdirilir.

image-reklam_opel_02

  • whatsapp
  • messenger
  • telegram
  • vkontakte
  • odnoklassniki