Rusiya prezidenti Vladimir Putinin yaxın müttəfiqlərindən birinə məxsus olduğu bildirilən 500 milyon dollarlıq superyaxta davam edən blokadaya baxmayaraq Hörmüz boğazından keçib.
Məlumata görə, sanksiyalara məruz qalan rusiyalı milyarder Aleksey Mordaşovla əlaqələndirilən, 142 metr uzunluğundakı “Nord” yaxtası həftəsonu Dubaydan Omanın paytaxtı Maskata yola düşüb.
Bu keçid son aylarda bölgədə qeydə alınan nadir şəxsi gəmi hərəkətlərindən biri hesab olunur.
Enerji tədarükü risk altındadır
Dünya üzrə xam neft və mayeləşdirilmiş təbii qaz (LNG) tədarükünün təxminən beşdə birinin keçdiyi Hörmüz boğazında dəniz daşımaları müharibədən əvvəlki səviyyədən xeyli aşağı olaraq qalır.
Bölgədəki gərginlik və blokadalar qlobal enerji bazarına da təsir göstərib. Brent markalı neftin qiyməti bazar ertəsi günü 109 dollara yüksəlib.
Rusiya ilə İran arasında yaxınlaşma
İranın ABŞ ilə münasibətlərində gərginlik davam etdiyi bir vaxtda Tehran administrasiyası Moskva ilə əlaqələrini gücləndirməyə çalışır.
İranın xarici işlər naziri Abbas Əraqçi Sankt-Peterburqda Vladimir Putinlə görüşündə iki ölkə arasında strateji münasibətləri vurğulayıb. Putin isə İran xalqının suverenliyi uğrunda mübarizə apardığını bildirib.
Sanksiya siyahısındakı milyarder
Təxminən 37 milyard dollar sərvətə sahib olan və “Severstal” şirkətinə rəhbərlik edən Aleksey Mordaşov 2022-ci ildə Rusiyanın Ukraynaya hücumundan sonra Qərbin sanksiya siyahısına salınıb.
Bundan əvvəl yaxtanın Honq Konq və Maldiv adalarında da hərəkət etdiyi bildirilirdi. Həmin ölkələr Qərbin aktivlərin dondurulması çağırışlarına baxmayaraq gəminin limanlara girişinə mane olmayıb.
Mordaşovun “Nord” yaxtasında olub-olmadığı isə hələlik məlum deyil.
