ABŞ prezidenti Donald Trampın və Rusiya lideri Vladimir Putinin 15 avqustda Alyaskada keçirilməsi planlaşdırılan görüşü öncəsi Avropa İttifaqı ölkələri Vaşinqtonu Moskvaya qarşı daha sərt sanksiyalar tətbiq etməyə çağırır. Vətəninfo.az xəbər verir ki, bu barədə Financial Times məlumat yayıb.
Nəşrin yazdığına görə, Avropa liderləri görüşün nəticələrinə təsir göstərmək və Rusiya ilə bağlı danışıqların istiqamətini müəyyən etmək üçün Tramp administrasiyasını təzyiqi artırmağa səsləyir.
Almaniya kansleri Fridrix Mers çıxışında bildirib:
“Putin yalnız təzyiq altında hərəkət edir. Aydındır ki, hərbi təzyiq kifayət qədər güclü deyil, ABŞ-ın sanksiyaları isə hələ tətbiq olunmayıb. Əgər bu sanksiyalar indi tətbiq olunsa, bu, Rusiya iqtisadiyyatına ciddi təsir göstərə bilər. Mən ABŞ prezidentini buna çağırıram”.
Mers əlavə edib ki, Alyaskadakı görüş konkret nəticələr verməlidir. Onun fikrincə, bu ya Rusiya üzərində daha ciddi təzyiqin qurulması, ya da Kremlin özü üçün müharibənin davam etdirilməsinin mümkün olmadığını başa düşməsi ilə nəticələnməlidir.
Avropa rəsmiləri hesab edirlər ki, gələcəkdə istənilən atəşkəs razılaşması Rusiyanın istənilən pozuntusuna qarşı ciddi iqtisadi sanksiyalarla müşayiət olunmalıdır. Bu, ölkənin müharibədən əvvəl iqtisadi divident qazanmasının və sonradan savaşı yenidən başlatmasının qarşısını almaq üçün zəruri sayılır.
Financial Times iki avropalı rəsmiyə istinadən qeyd edir ki, Avropa İttifaqı dondurulmuş Rusiya aktivlərindən təsir vasitəsi kimi istifadə imkanlarını nəzərdən keçirir.
Belə təkliflərdən biri Belçikada yerləşən Euroclear klirinq palatasında dondurulmuş 190 milyard avroluq Rusiya aktivlərinə əsaslanır. Plana görə, bu vəsait Ukraynaya kredit şəklində yönəldilə bilər.
