Peugeot oktyabr ayında keçiriləcək Paris Avtosalonunda iki yeni konsept avtomobilini təqdim etməyə hazırlaşır.
Vətəninfo.az xəbər verir ki, şirkətin baş direktoru Alen Favenin sözlərinə görə, hər iki konsept Peugeot-un yeni dizayn dilini və yaxın illərdə markanın seriya istehsalı modellərində tətbiq ediləcək texnologiyaları nümayiş etdirəcək.
Fave bildirib ki, yeni konseptlər “Peugeot brendinin gələcəyi haqqında çox şey söyləyəcək”. O, avtomobillərlə bağlı texniki detalları açıqlamasa da, onların şirkətin gələcək inkişaf strategiyasını əks etdirəcəyini və markanın zəngin tarixi irsindən ilham aldığını vurğulayıb.
Onun sözlərinə görə, Peugeot keçmişə qayıtmaq deyil, tarixi irsi gələcəyin avtomobillərini formalaşdıracaq ideya mənbəyi kimi dəyərləndirir. Məhz bu yanaşma Parisdə nümayiş etdiriləcək konseptlərin əsas fəlsəfəsini təşkil edəcək.
Qeyd edək ki, Peugeot son illərdə də tarixi modellərindən ilhamlanan bir sıra konseptlər hazırlayıb. Belə ki, Peugeot E-Legend 1960-cı illərin Peugeot 504 Coupe modelinin müasir interpretasiyası kimi təqdim edilmişdi. Daha yeni Polygon konsepti isə əfsanəvi Peugeot 205 hetçbekindən ilhamlanaraq gələcək nəsil elektrikli Peugeot e-208 modelinin mümkün dizaynını nümayiş etdirmişdi.
Bununla yanaşı, Alen Fave yeni Peugeot e-208 modelinin Paris avtosalonunda təqdim olunacağı barədə yayılan iddiaları təkzib edib. Onun sözlərinə görə, ikinci nəsil elektrik supermini yalnız gələn ilin ikinci yarısında keçiriləcək ayrıca təqdimat tədbirində nümayiş olunacaq.
Yeni konseptlər Peugeot-un model sırasının geniş yenilənməsi strategiyasının tərkib hissəsidir. Şirkət 2030-cu ilədək qlobal satışlarını ötən ilki 1,1 milyon avtomobildən 1,5 milyon avtomobilə çatdırmağı qarşıya məqsəd qoyub.
Bu hədəfə nail olmaq üçün Peugeot növbəti dörd il ərzində yeddi yeni model təqdim etməyi planlaşdırır. Bunlara yeni nəsil e-208, tamamilə yenilənmiş 308, Fransada istehsal ediləcək üç yeni C seqmenti modeli, eləcə də Çin şirkəti Dongfeng ilə əməkdaşlıq çərçivəsində hazırlanacaq iki D seqmentli flaqman model daxildir. Sonuncuların yalnız Çin bazarında satışa çıxarılması nəzərdə tutulur.
Hələlik oktyabr ayında nümayiş olunacaq konseptlərin gələcəkdə seriya istehsalına buraxılıb-buraxılmayacağı açıqlanmayıb. Peugeot daha əvvəl təqdim etdiyi Inception, Onyx və Instinct kimi konseptləri də əsasən gələcəyin texnologiyalarını və dizayn baxışını nümayiş etdirmək məqsədilə hazırlamışdı.
Peugeot sirli avtomobilini təqdim edəcək
