Ümumdünya Səhiyyə Təşkilatı (ÜST) Əfqanıstanda qızılcaya yoluxma hallarının kəskin artması ilə bağlı narahatlığını ifadə edib.
Təşkilatın sözçüsü Kristian Lindmayer Cenevrədə keçirdiyi brifinqdə bildirib ki, 24-30 yanvar həftəsi ərzində ölkədə bu xəstəliyə yoluxma və ölüm halları 18%, yanvarın 31-dən fevralın 6-dək isə 40% artıb.
“Qızılca Əfqanıstanda endemikdir. 2019 və 2020-ci illərdə xəstəliyin aşağı yayılma dövründən sonra 2021-ci ilin iyul ayının sonundan etibarən bütün əyalətlərdə qızılcaya yoluxma hallarının sayı artıb. Eyni zamanda, ən yüksək göstəricilər son dörd həftədə qeydə alınıb”, – Lindmayer deyib.
Xəstələrin 91%-i və ölənlərin 97%-i 5 yaşa qədər uşaqlardır. Ölənlərin sayı nisbətən az olsa da, 2022-ci ilin yanvar ayında yoluxmanın artması ölüm sayının yüksələcəyini göstərir.
ÜST rəsmisi qeyd edib ki, bu cür artım Əfqanıstanda qida çatışmazlığının həddən artıq yüksək olması baxımından xüsusi narahatlıq doğurur.
2021-ci ilin dekabrında Əfqanıstanda peyvənd kampaniyası aparılıb və bu kampaniya zamanı ən çox zərər çəkmiş əyalətlərdə 1,5 milyon uşaq qızılcaya qarşı peyvənd edilib.
