Oktyabrın 3-də Rusiyanın Xarkov və Poltava vilayətlərində enerji infrastrukturu obyektlərinə endirdiyi zərbələrdən sonra Ukrayna təbii qaz hasilat imkanlarının 60 faizindən çoxunu itirib və nəticədə gələn qışdan çıxmaq üçün yanacaq idxalına təxminən 1,9 milyard avro xərcləməli olacaq. Vətəninfo.az xəbər verir ki, bu barədə Bloomberg yazıb.
Bu xəbər agentliyinin məlumatına görə, enerji infrastrukturuna hücumlar davam edərsə, Ukrayna 2026-cı ilin mart ayının sonuna qədər təxminən 4,4 milyard kubmetr təbii qaz almalı olacaq. Bu məbləğ ölkənin illik enerji istehlakının 20 faizinə bərabərdir.
Bloomberg əlavə edir ki, Ukrayna artıq bu il xarici təchizatçılardan təxminən 4,6 milyard kubmetr təbii qaz alıb. Kiyev hesab edir ki, bu ilin sonuna qədər ölkənin 5,8 milyard kubmetr təbii qaza ehtiyacı olacaq, baxmayaraq ki, bu rəqəm bir neçə amildən, xüsusən də Ukraynanın enerji infrastrukturunu nə qədər tez bərpa edə biləcəyindən asılı olaraq arta bilər.
