image-dzhavidbackend

Şərqin Şekspiri qırğız dilində

image-reklam_sirab_01

Qırğız Respublikasının kütləvi informasiya vasitələrində kitabın çap olunması böyük əks-səda doğurub. Qırğızıstanın “NEXT TV”, “ELTR” televiziya kanallarında, ən məşhur “Veçerniy Bişkek”, dövlət “Slovo Qırğızstana” (Qırğızıstanın Sözü), ictimai və siyasi “Barometr” qəzetlərində,  “Kabar” Milli İnformasiya Agentliyində, “01.kg”, “Today.kg”, “Akmedia.kg” informasiya portallarında, və digər KİV-lərdə kitab barəsində geniş məlumat verilmişdir.

Kitabın annotasiyasında deyilir: «Azərbaycan ədəbiyyatının əfsanəvi klassiki, nəhəng humanist şair, romantik dramaturq və müdrik filosof Hüseyn Cavidin əsərlərindən ibarət toplu ilk dəfə qırğız dilində nəşr edilmişdir.

“Əsərləri” adlı kitaba görkəmli şairin: “Xəyyam”, “Topal Timur”, “İblis” dramları, həmçinin “Çiçək sevgisi”, “Solğun bənövşələr”, “Sevinmə, gülmə, quzum!”, “Mənim tanrım”, “Görmədim”, “Kometa”, “Şeyx Sənan”, “Pənbə çarşaf”, “Get!”, “Qaçqın” adlı şeirləri daxil edilmişdir.

Toplu Azərbaycanın Qırğız Respublikasında fövqəladə və səlahiyyətli səfiri Hidayət Orucovun “Şərqin Şekspiri” adlı ön sözü ilə açılır. Nəşrin iki qardaş ölkə xalqlarının mədəni qarşılıqlı zənginləşməsinə xidmət edəcəyi bildirilir.

Görkəmli Azərbaycan dramaturqunun əsərləri dünyanın bir çox dillərinə tərcümə edilmişdir. “Çox şadam ki, bu gün bu ölməz əsərlər böyük Manasın, eləcə də qırğız xalqının böyük oğlu Çingiz Aytmatovun dilində nəşr olundu”, – deyə səfir qeyd edir.

“Hüseyn Cavid Azərbaycan və Şərq poeziyasının dəyərlərini daha da artıran və türkçülük ideyalarını ora daxil edən görkəmli sənətkardır. Məhz romantizmin banisi, milli ədəbiyyatda poetik dram və faciə janrının kəşfçisi odur.

Sözün qüdrətli sənətkarının mənəvi zənginliyi ilə seçilən əsərləri bir çox nəsillərin estetik zövqünü formalaşdırmışdır. Onun fəlsəfi lirikası Ulu Tanrıya sevgi və gözəllik, yaxşılıq və pislik, işıqla qaranlıq qüvvələr arasındakı mübarizə, rəğbət, humanizm və xeyriyyəçilik kimi yanan problemlərə, vacib və əbədi mövzulara toxunur.

Sağlığında şöhrət qazanan bənzərsiz şairə Şərqin Şekspiri adı verilməsi təsadüfi deyildi. Onun bütün əsərləri dərin fəlsəfi məna daşıyır və hansı dilə tərcümə olunmasından asılı olmayaraq oxucunu biganə qoymur. Cavidin yaradıcılığı bu gün də aktuallığını qoruyub saxlayır.”

İstedadlı şair və mütəfəkkir çox parlaq, lakin faciəli həyat yaşadı. O, Azərbaycan ədəbiyyatında və dramında yeni bir səhifə açdı və milli teatrın inkişafına güclü təsir göstərdi. Hüseyn Cavid zəngin bir bədii irs qoyub getdi. İstedadının qiymətli bəhrəsi əsl milli sərvətə çevrildi.

Tanınmış şair Kozogeldi Kulteginin, eləcə də filoloq-türkoloq Kalmamat Kulamşayevin böyük zəhməti sayəsində qırğız oxucuları Azərbaycanın ən yaxşı və dünya şöhrətli şairlərindən birinin yaradıcılığı, həm də zəngin daxili dünyası və dərin fəlsəfi düşüncələri ilə daha yaxından tanış olacaqlar.

Kitab «Turar» nəşriyyatında yüksək poliqrafik səviyyədə, ən keyfiyyətli rəngli illüstrasiyalarla nəşr olunmuşdur.

 

image-reklam_opel_02

  • whatsapp
  • messenger
  • telegram
  • vkontakte
  • odnoklassniki