Avqustun 24-nə keçən gecə Rusiya ərazisinə genişmiqyaslı pilotsuz uçuş aparatı (PUA) hücumu həyata keçirilib. Rusiya Müdafiə Nazirliyinin məlumatına görə, hava hücumundan müdafiə qüvvələri ölkənin cənub və qərb bölgələri, həmçinin Azov və Qara dənizləri üzərində 351 Ukrayna dronunu aşkarlayaraq məhv edib.
Vətəninfo.az xəbər verir ki, hücumlar nəticəsində Rusiyanın cənubunda yerləşən Ozon şirkətinin bir sıra logistika mərkəzlərinə də ziyan dəyib.
Şirkətin açıqlamasına görə, dronlar Stavropol diyarının Nevinnomıssk şəhərində və Dağıstanın Mahaçqala şəhərindəki Ozon anbarlarını hədəfə alıb. Mahaçqaladakı logistika mərkəzində yanğın baş verib. Bir neçə nəfərin yaralandığı bildirilir.
Ozon hadisə zamanı əməkdaşların təxliyə edildiyini açıqlayıb. Şirkətin ilkin məlumatına əsasən, yaralanan şəxslərə tibbi yardım göstərilib və onların həyatı üçün təhlükə olmadığı bildirilib. Mahaçqaladakı anbarın fəaliyyəti müvəqqəti dayandırılıb.
Bundan əlavə, mümkün PUA hücumu təhlükəsi ilə əlaqədar Adıgeysk və Nevinnomısskdakı Ozon anbarlarında da əməkdaşlar təxliyə edilib. Şirkət həmin obyektlərdə işçilərin xəsarət almadığını və anbarlardakı malların təhlükəsiz olduğunu bildirib.
Adıgey Respublikasının rəhbəri Murat Kumpilov isə Taxtamukayski rayonunda yerləşən Ozon anbarında PUA hücumu nəticəsində yanğın baş verdiyini açıqlayıb.
Rusiya Müdafiə Nazirliyinin məlumatına görə, dronlar Həştərxan, Belqorod, Bryansk, Kursk və Rostov vilayətləri, Krasnodar və Stavropol diyarları, Adıgey Respublikası və Krım üzərində, həmçinin Azov və Qara dənizlərinin suları üzərində məhv edilib.
Kuban bölgəsində də itkilər qeydə alınıb. Krasnodarın Prikubanski rayonunda PUA hücumu nəticəsində özəl uşaq mərkəzinə ziyan dəyib. Hadisə nəticəsində iki uşağın öldüyü, yeddi nəfərin yaralandığı bildirilir. Yaralananlar arasında iki böyüyün də olduğu qeyd olunur.
Hücumların miqyası və nəticələri ilə bağlı məlumatlar Rusiya tərəfinin açıqlamalarına əsaslanır. Ukrayna tərəfi isə bu konkret hücumlarla bağlı təqdim olunan məlumatlara münasibət bildirməyib.
