Britaniya Xarici İşlər Nazirliyi hökumət rəsmilərinə düşmən dövlət ifadəsini işlətməyi qadağan edib. Hakimiyyət orqanları bu terminlə artıq Rusiya Federasiyası, Konqo Demokratik Respublikası və İranı nəzərdə tutmamalıdır.
Vətəninfo.az xəbər verir ki, bu barədə Britaniyanın Times qəzeti öz mənbələrinə istinadən məlumat yayıb.
Məqalədə deyilir: “Onlar əslində dövlət sənədlərində, elektron poçtda və WhatsApp-da dövlət qulluqçuları, nazirlər və müşavirlər arasında daxili mesaj mübadiləsi zamanı bu ifadənin istifadəsini qadağan ediblər.
Qəzetin yazdığına görə, “düşmən dövlət” ifadəsi işlədildiyi üçün Xarici İşlər Nazirliyi bu yaxınlarda məmurlardan birinin təqdim etdiyi sənədi rədd edib.
Xarici İşlər Nazirliyinin bəyanatında deyilir: “Dövlətlər təbiətcə düşmən deyil, sadəcə olaraq düşmənçilik hərəkətləri edirlər.
“Times”in yazdığına görə, Britaniya rəsmiləri əvvəlki hökumətlər dövründə açıqlanan sənədləri redaktə edərək “düşmən dövlətlər” ifadəsini “düşmən aktorlar” və “düşmən dövlətin fəaliyyəti” ifadəsini “dövlət təhdidləri” ilə əvəz ediblər.
