Çinin şimal-qərbində baş verən 6,2 bal gücündə zəlzələ nəticəsində azı 118 nəfər ölüb, yüzlərlə insan yaralanıb. Bu barədə Vətəninfo.az BBC nəşrinə istinadən xəbər verir.
Zəlzələ dekabrın 18-də, gecə yarısından əvvəl baş verib. Qansu əyalətində 105 nəfər həlak olub, 250-dən çox insan yaralanıb. Qonşu Çinxay əyalətində isə 13 nəfər ölüb, 182 nəfər yaralanıb.
Yeraltı təkanlar nəticəsində 5000-dən çox ev və bir çox yol zədələnib. Elektrik və su təchizatında fasilələr yaranıb. Xilasedicilər -13 dərəcə Selsi şəraitində işləyir, dağıntılar altından sağ qalanları tapmağa çalışırlar. Səlahiyyətlilərin sözlərinə görə, temperaturun aşağı olması səbəbindən sağ qalanları tapmaq üçün vaxt həmişəkindən daha qısadır.
Səlahiyyətlilər təxliyyə edilənlər üçün tez bir zamanda müvəqqəti düşərgələr hazırladılar.