Fransanın daxili kəşfiyyat orqanları Rusiyanın 2027-ci ildə keçiriləcək prezident seçkiləri ərəfəsində ölkədə casusluq və rəqəmsal müdaxilə fəaliyyətlərini gücləndirə biləcəyi barədə xəbərdarlıq edib.
Vətəninfo.az “Intelligence Online” nəşrinə istinadən yaydığı məlumata görə, Fransa Daxili Təhlükəsizlik Baş İdarəsi (DGSI) Moskvanın seçki prosesinə təsir göstərmək məqsədilə mövcud kəşfiyyat şəbəkələrini fəallaşdıra biləcəyini ehtimal edir.
Məlumata əsasən, 2022-ci ilin fevralından bəri Fransada Rusiya kəşfiyyatının diplomatik örtük altında fəaliyyət göstərən əməkdaşlarının sayı təxminən iki dəfə azalıb. Paris 2022-ci ilin aprelində 35 Rusiya diplomatını, daha sonra isə diplomatik toxunulmazlıqdan istifadə edərək kəşfiyyat fəaliyyəti ilə məşğul olmaqda şübhəli bilinən daha altı şəxsi ölkədən çıxarıb.
Buna baxmayaraq, Fransa xüsusi xidmət orqanları Rusiyanın ölkədəki kəşfiyyat imkanlarının tamamilə aradan qalxmadığını bildirirlər. Son illərdə ənənəvi casusluqla yanaşı, kibermüdaxilə, yerli vasitəçilərdən istifadə etməklə məlumat toplama və sosial şəbəkələr vasitəsilə dezinformasiya yayılması kimi fəaliyyətlərin də artdığı qeyd olunur.
Fransa təhlükəsizlik qurumlarının diqqətində Rusiyanın Federal Təhlükəsizlik Xidməti (FSB) və Baş Kəşfiyyat İdarəsi (QRU) ilə əlaqələndirilən bir sıra şəbəkələr var. Bunların arasında 61240 və 29155 saylı bölmələr, eləcə də “Storm-1516”, “Matryoshka” və “Turla” adlı əməliyyat şəbəkələri xüsusi qeyd edilir.
Fransa Xarici İşlər Nazirliyi 13 iyul 2026-cı ildə yaydığı açıqlamada FSB-nin 16-cı Mərkəzinin 61240 saylı bölməsini Fransaya qarşı kibercasusluq fəaliyyəti ilə əlaqələndirib.
Rəsmi açıqlamaya görə, “Turla” adlı kiberəməliyyat üsulundan istifadə edilməklə 2017-ci ildən etibarən Fransa Müdafiə Nazirliyinin elektron poçt sistemləri, Moskvadakı Fransa səfirliyinin diplomatik şəbəkəsi və ədliyyə sektoru ilə əlaqəli serverlər hədəfə alınıb.
Bundan başqa, QRU ilə əlaqələndirilən APT28 qrupunun da Fransaya qarşı kiberfəaliyyətdə iştirak etdiyi bildirilir.
Seçkilərə mümkün rəqəmsal müdaxilə məsələsində isə QRU-nun 29155 saylı bölməsi ilə əlaqələndirilən “Storm-1516” şəbəkəsi diqqət mərkəzindədir.
Fransanın xarici rəqəmsal müdaxilələri izləyən VIGINUM qurumunun 2025-ci ilin mayında açıqladığı hesabatda 2023-cü ilin avqustundan 2025-ci ilin martınadək 77 məlumat manipulyasiyası hadisəsinin müəyyən edildiyi bildirilir. Həmin məlumatların sosial şəbəkələrdə 38 877 paylaşım edildiyi və 55,8 milyondan çox baxış topladığı qeyd olunur.
Hesabatda bu kampaniyaların əsas hədəflərindən birinin Ukrayna hakimiyyətinin nüfuzdan salınması və Qərbin Kiyevə hərbi yardımının zəiflədilməsi olduğu vurğulanır.
Fransa kəşfiyyatının diqqət çəkdiyi digər məsələ ölkənin siyasi fiqurlarına qarşı dezinformasiya kampaniyalarıdır.
VIGINUM-un məlumatına görə, 2026-cı ilin fevralında Prezident Emmanuel Makronu Ceffri Epşteyn işi ilə əlaqələndirən saxta məlumatlar aşkarlanıb. Bu materialların “Storm-1516” və “CopyCop” şəbəkələri vasitəsilə yayıldığı ehtimal edilir.
Bundan əlavə, Havr şəhərinin meri Eduard Filip, Avropa Parlamentinin üzvü Rafael Qluksman və Fransa siyasətçisi Qabriel Attalın da saxta xəbərlərin və təqlid media səhifələrinin hədəfinə çevrildiyi bildirilir.
2026-cı ilin martında keçirilən bələdiyyə seçkiləri ərəfəsində də xarici rəqəmsal müdaxilənin bir neçə nümunəsi müəyyən edilib. Onlardan birinin Parisdə namizəd olan Pyer-İv Bournazelə qarşı “Storm-1516” şəbəkəsi vasitəsilə həyata keçirildiyi iddia olunur.
