İran prezidenti Məsud Pezeşkian ölkənin təhlükəsizliyi, dövlətin sabitliyi və mümkün təhdidlər fonunda diqqətçəkən açıqlama ilə çıxış edib. O, xalqın hakimiyyətə dəstəyini İranın qarşılaşdığı təhlükələrə qarşı əsas güc mənbəyi kimi qiymətləndirib.
Vətəninfo.az xəbər verir ki, Pezeşkian bildirib ki, dövlətin gücü və dayanıqlılığı ilk növbədə xalqın iradəsindən və dəstəyindən asılıdır.
“Əgər xalq bizimlədirsə, düşmən məni və mənim kimi minlərlə insanı öldürsə belə, heç nə edə bilməyəcək. Biz düşmənin bütün təhdidlərini qətiyyətlə dəf edə bilərik”, – deyə İran prezidenti vurğulayıb.
İran liderinin bu bəyanatı regionda davam edən hərbi-siyasi gərginlik, Tehrana qarşı mümkün hücum ssenariləri və ölkənin yüksək vəzifəli şəxslərinin təhlükəsizliyi ilə bağlı müzakirələrin intensivləşdiyi bir vaxtda səsləndirilib.
Son dövrlərdə beynəlxalq mediada İranın strateji obyektlərinə və yüksək rütbəli rəsmilərinə qarşı mümkün zərbələr barədə müxtəlif məlumatlar yayılır. Belə bir şəraitdə Pezeşkianın açıqlaması həm ölkə daxilində siyasi həmrəyliyin qorunmasına, həm də xarici qüvvələrə siyasi mesajın ünvanlanmasına yönəlmiş mövqe kimi dəyərləndirilə bilər.
İran rəsmiləri daha əvvəl də mümkün eskalasiya şəraitində dövlət idarəçiliyinin fasiləsizliyinin və ölkənin sabitliyinin qorunması üçün müvafiq tədbirlərin görüldüyünü bəyan ediblər.
Pezeşkianın son çıxışı isə Tehranın təhlükəsizlik məsələlərində xalqın dəstəyini əsas strateji amil hesab etdiyini bir daha nümayiş etdirir.
