Türkiyədə investisiya fondları ilə bağlı genişmiqyaslı maliyyə qalmaqalı getdikcə daha ciddi xarakter alır. Hüquq-mühafizə orqanlarının apardığı istintaq çərçivəsində 433 şübhəlidən 112-si həbs edilib, 38 nəfər barəsində isə axtarış elan olunub.
Türkiyənin ədliyyə naziri Akın Gürlek bildirib ki, qanun pozuntularında iştirak edən bütün şəxslər, o cümlədən yüksək vəzifəli dövlət məmurları və siyasətçilər qanun qarşısında cavab verməli olacaqlar.
Nazir vurğulayıb ki, istintaqa bütün dövlət qurumları cəlb olunub və araşdırmalar heç bir şəxsin statusundan və vəzifəsindən asılı olmayaraq davam etdiriləcək. O, həmçinin zərərçəkmiş vətəndaşların itirilmiş vəsaitlərinin geri qaytarılacağına dair təminat verib.
Məlumata görə, Türkiyədə «fond bazarı qalmaqalı» kimi tanınan cinayət işi çərçivəsində 800 milyard türk lirəsindən artıq vəsaitin mənimsənilməsi faktı üzə çıxarılıb.
Ötən həftə Vətən Partiyasının sədri Doğu Perinçek qalmaqalla bağlı diqqətçəkən açıqlama verib. O, təxminən 400 nəfərin iştirak etdiyi cinayət işi üzrə təqsirləndirilən şəxslərin 300-nün hakim Ədalət və İnkişaf Partiyasının (AKP) üzvü olduğunu iddia edib. Perinçek, həmçinin maliyyə fırıldaqçılığında yüksək vəzifəli dövlət məmurlarının da iştirak etdiyini bildirib.
Ədliyyə naziri Akın Gürlekin son açıqlamaları istintaqın dövlət idarəçiliyinin daha yüksək səviyyələrinə qədər genişlənə biləcəyi ehtimalını artırır. Bu isə Türkiyədə siyasi və maliyyə dairələrində qalmaqalın yeni mərhələyə qədəm qoyduğunu göstərir.
