Xəbər verdiyimiz kimi, bir neçə gün əvvəl Yeni Azərbaycan Partiyasının Veteranlar Şurasının sədri Arif Rəhimzadə Ramiz Mehdiyevin YAP-dan çıxarılacağını anons etmişdi.
A.Rəhimzadə bildirmişdi ki, bununla bağlı bu günlərdə partiyanın müvafiq qurumlarının iclası olacaq: “Ramiz Mehdiyev nə YAP-ın, nə də YAP Veteranlar Şurasının üzvü kimi qala bilər. Məhkum olunan insan partiyada qala bilməz”.
TV Müsavatın “Səhər Xəbər” verilişində aparıcı Sevinc Telmanqızı yenidən A.Rəhimzadə ilə əlaqə yaradıb. Aparıcı Veteranlar Şurasının sədrinə “Ramiz Mehdiyev niyə hələ də YAP-dan çıxarılmır?” deyə sual verib. A.Rəhimzadənin cavabı isə bu formada olub: “Mən o məsələyə heç bir aydınlıq gətirə bilmirəm. Gözləmək lazımdır. Tələsmək olmaz. Hər şey həll olunacaq, amma vaxtında”.
“Yığıncağın keçirilməsi üçün nəsə problem var?” sualına cavabda isə A.Rəhimzadə bildirib ki, heç bir problem yoxdur: “Hər şey vaxt tələb edir. Bu da onun kimi vaxt tələb edir. Çox təşəkkür edirəm”.
