Türkiyədə zəlzələdən zərər çəkənlərə dəstək üçün “Qardaş Köməyi” Platforması yaradıldı – FOTO

Türkiyə Respublikasının cənub-şərqində baş vermiş güclü zəlzələ, təbii fəlakət nəticəsində çoxsaylı insan tələfatının olması Azərbaycan xalqını dərindən üzmüşdür. Azərbaycanın “Bir millət, iki dövlət” prinsipindən çıxış edən rəsmi qurumları, o cümlədən ictimaiyyət təmsilçiləri qardaş Türkiyəyə dəstəklərini bu və ya digər şəkildə açıqlayırlar.

Hazırda vəziyyətin son dərəcədə ağır olduğunu, qardaş türk xalqıyla həmrəyliyin vacibliyini nəzərə alaraq Azərbaycan Sahibkarlar Konfederasiyası, MÜSİAD Azərbaycan, ATİB, TUİB, Türkiyə Universitetləri Məzunları İctimai Birliyi, Azərbaycan Əczaçılar Klubu, Gəncliyə Yardım Fondu, Müasir İnkişaf Birliyi, KOBSKA, Türkiyə Məzunu Ziyalılar və İş Adamları Platformu, Tərxis Olunmuş Hərbçilərin Gəncləri Maarifləndirmə Birliyinin yetkililəri ilə birlikdə MÜSİAD Azərbaycan ofisində, dəstəkçi təşkilat olan KOBİA-nın təmsilçisinin də qatılmasıyla “Qardaş Köməyi ” platforması təsis edib.

“Qardaş Köməyi” Platforması (sədr Rəşad Cabirli) zəlzələdən zərər çəkənlərə yardım etmək üçün Azərbaycan və Türkiyənin aidiyyatı dövlət qurumları ilə birgə koordinasiyalı fəaliyyətin həyata keçirilməsini razılaşdırb.

Vətəninfo.az xəbər verir ki,
08 fevral 2023-cü il tarixdə Platformanın geniş toplantısının keçirilməsi, yardım üçün görüləcək işlərlə bağlı geniş açıqlama verməsi razılaşdırılıb.

Platforma üzvləri zəlzələdən zərərçəkən insanlara pul dəstəyi göstərmək istəyən insanlara “SƏNİNLƏYƏM-TÜRKİYƏM!” adlı yardım kampaniyasına qoşulmağa çağırıb. Belə həssas məqamlarda sui-istifadə hallarının qarşısının alınması, o cümlədən pərakəndəliyə yol verməmək üçün aşağıda məlumatları elan olunan yardım kampaniyasına həm fiziki, həm də hüquqi şəxslərin qoşulması lazımdır.

“Ziraat Bank Azərbaycan”ın şöbələrindən və mobil hesablarından Türkiyənin AFAT təşkilatının (Daxili İşlər Nazirliyinin Fövqəladə Vəziyyətin İdarəedilməsi Başqanlığı) hesabına Türkiyə lirəsi, ABŞ dolları və Avro ilə köçürmə edilməsi lazımdır.