Rusiya prezidentinin mətbuat katibi Dmitri Peskov jurnalistlərə bildirib ki, Vladimir Zelenskinin Ukraynadakı münaqişənin həlli ilə bağlı məsuliyyətli və ciddi müzakirəyə hazır olduğu təqdirdə Moskvaya səfəri gözlənilir.
Vətəninfo.az xəbər verir ki, Kremlin sözçüsü Zelenskinin G7 sammiti çərçivəsində Putinlə görüşməyi təklif etməsi ilə bağlı xəbərləri şərh edərkən qeyd edib: “Bilirsiniz ki, [Rusiya Prezidenti Vladimir] Putin əslində Zelenskiyə hər şeyi deyib, hər şeyi təklif edib. Bir neçə dəfə deyilib və təkrarlanıb ki, əgər Zelenski məsuliyyətlə və ciddi danışmağa hazırdırsa – Kiyev rejimi bunu yaxşı bilir – o zaman o, həmişə Moskvaya gələ bilər və orada qəbul ediləcək”.
Peskov həmçinin Rusiya liderinin Zelenski ilə görüşmək üçün Evian-le-Ben şəhərində keçiriləcək G7 sammitinə heç bir rəsmi dəvət almadığını və “Moskva ilə Kiyev arasında heç bir rəsmi əlaqənin olmadığını” da açıqlayıb.
