İranla əlaqəli hakerlər iyul ayında Britaniya elektrik stansiyasına görünməmiş kiberhücum həyata keçirib və nəticədə qurğu dörd gün ərzində işlək vəziyyətdə qalıb.
Vətəninfo.az xəbər verir ki, Britaniyanın “The Telegraph” qəzetinin məlumatına görə, hücum ABŞ-dakı su təchizatı obyektlərinə qarşı bir sıra kiberhücumlarla eyni vaxtda baş verib. Hücumlar 12 ştatdakı sistemlərə təsir edib və bu da Ağ Evdə narahatlığa səbəb olub.
Qəzetin məlumatına görə, hücuma məruz qalan Britaniya elektrik stansiyası nisbətən kiçik idi. Böyük Britaniyada onlarla oxşar qurğu var və onların bir çoxu yalnız nadir hallarda istifadə olunur.
Ölkə hökuməti təhlükəsizliklə bağlı narahatlıqları əsas gətirərək elektrik stansiyasının adını açıqlamayıb.
Bundan əvvəl, Böyük Britaniyada baş verən böyük kiberhücumlar Milli Səhiyyə Xidməti sistemlərində fasilələrə səbəb olmuş, məktəblərin İT xidmətlərinə çıxışını əngəlləmiş və Jaguar Land Rover müəssisələri də daxil olmaqla sənaye müəssisələrinin fəaliyyətini pozmuşdu.
