ABŞ Prezidenti Cozef Bayden iyunun 25-28-də Almaniyada keçiriləcək G7 liderlərinin sammitində və İspaniyada təşkil olunacaq NATO sammitində iştirak etmək üçün Avropaya səfər edəcək.
Bu barədə Ağ Evin mətbuat katibi Karin Jan-Pyer bildirib.
“Bayden G7 liderlərinin zirvə toplantısında iştirak etmək üçün iyunun 25-də Almaniyanın cənubundakı Elmau şəhərinə gedəcək”, – o deyib.
Zirvə görüşündə G7-nin Ukraynaya verdiyi dəstək, iqtisadi və demokratik dayanıqlıq, iqlim dəyişikliyi, inkişaf və qlobal sağlamlıq təhlükəsizliyi müzakirə ediləcək. Jan-Pyer toplantıda Rusiya-Ukrayna müharibəsi səbəbindən ortaya çıxan qida və enerji böhranının da diqqət mərkəzində olacağını vurğulayıb. “Müharibə sammitin mühüm mövzuları arasında olacaq”, – o qeyd edib.
“İyunun 28-də Bayden NATO-nun sammitində iştirak etmək üçün İspaniyanın paytaxtı Madridə gedəcək”, – Ağ Ev rəsmisi deyib.
