Polşa Belarusla sərhəddə hərbi personalının sayını təxminən 3 dəfə artıracaq. Vətəninfo.az-ın məlumatına görə , bu barədə Polşanın Milli Müdafiə Nazirliyi məlumat yayıb.
“Avqustun 1-də yeni missiya başlayacaq. İki əməliyyat başa çatacaq: biri maarifləndirici, digəri isə sərhədi qorumaq məqsədi daşıyır. 17 minə qədər hərbçinin iştirak edəcəyi “Təhlükəsiz Podlasie” əməliyyatı yaradılacaq”, – məlumatda deyilir.
Nazirlik qeyd edib ki, hazırda Belarusla sərhəddə 6 minə yaxın əsgər var. Açıqlamaya görə, müvafiq müraciətlər olacağı təqdirdə sərhədə əlavə qüvvə və resurslar göndəriləcək.
2021-ci ilin ortalarında bir neçə min miqrant AB ölkələrinə çatmaq ümidi ilə Polşa-Belarus sərhədində toplaşıb. O vaxtdan bəri hər ay bir neçə yüz qeyri-qanuni mühacir Polşaya daxil olmağa çalışır. Polşa hakimiyyəti sərhəd mühafizəsini gücləndirib. onlar ordunu cəmləşdiriblər və miqrasiya böhranında Minski günahlandıraraq qeyri-qanuni mühacirlərin cəhdlərini dayandırırlar.
Belarus bütün bu ittihamları rədd edərək, Polşanın miqrantları öz ərazisinə zorla qovduğunu və qaçqınlarla bağlı vəziyyəti süni şəkildə gərginləşdirdiyini bildirir.
Polşa artıq Belarusla sərhəddə sədd çəkib. Divarın uzunluğu 186 kilometr, hündürlüyü beş metrdir. Onun dəyəri 1,6 milyard zloti (təxminən 400 milyon dollar) təşkil edir.
