Qarabağdakı qanunsuz erməni birləşmələrinin hərbi karvanının rus sülhməramlılarının müşayiəti altında hərəkət etməsinə dair video yayılıb.
Bu barədə “Caliber” nəşrinin yayımladığı 03.07.2023-cü il tarixili video və foto materiallarda rus sülhməramlılarının müşayiəti altında Ermənistana məxsus hərbi karvanın Xankəndi-Xəlfəli-Turşsu torpaq yolu ilə hərəkəti əks olunub.
Nəşrin əldə etdiyi məlumata görə, kolonun əvvəlində Rusiya sülhməramlı kontingentinin 2 “UAZ Patriot” maşını, onun ardınca qanunsuz erməni silahlı birləşmələrinə məxsus bir ədəd çadırlı “Ural” və su çəni olan bir ədəd “KamAZ”, sonda isə BTR-82A hərəkət edir.
Hərbi kolonla qanunsuz erməni silahlı birləşmələrinin postlarına ərzaq, su və sursat daşındığı bildirilib.
