ABŞ Prezidenti Donald Trampın xüsusi sülh elçisi Cared Kuşner bildirib ki, Fələstin anklavının yenidən qurulmasına HƏMAS tamamilə tərksilah edilməyənədək başlanılmayacaq.
Vətəninfo.az xəbər verir ki, Kuşner bu barədə HƏMAS rəsmiləri və İsrailin Baş naziri Binyamin Netanyahu ilə keçirdiyi görüşlərdən sonra açıqlama verib. Trampın kürəkəni olan xüsusi elçi bazar günü Qahirədə HƏMAS nümayəndələri ilə nadir görüş keçirib, ertəsi gün isə Netanyahu ilə müzakirələr aparıb.
Onun sözlərinə görə, HƏMAS Trampın sülh planını dəstəklədiyini bir daha təsdiqləyib və silahlarını təhvil vermək öhdəliyi götürüb. Bununla belə, Kuşner bu öhdəliyin nə dərəcədə yerinə yetiriləcəyinin zamanla məlum olacağını bildirib.
“Qəzzanı yenidən qurmaq planımız var. Lakin demilitarizasiya həyata keçirilməyənədək Qəzzanın yenidən qurulmasına icazə verməyəcəyik. Heç kim terrorçular tərəfindən ələ keçirilə və ya yenidən dağıdıla biləcək bir əraziyə əlavə vəsait yatırmaq istəmir”, – deyə Kuşner bildirib.
Xüsusi elçi həmçinin ABŞ-ın İsrailin təhlükə yarandığı təqdirdə özünü müdafiə etmək hüququnu məhdudlaşdırmayacağını vurğulayıb.
Netanyahu isə Trampın iyul ayında açıqladığı 15 maddəlik sülh planına qarşı çıxaraq, ötən həftə İsrail ordusunun HƏMAS tamamilə tərksilah edilənədək Qəzzadan çəkilməyəcəyini bəyan edib.
HƏMAS rəsmiləri isə İsrail qoşunlarının Qəzzadan çıxarılmasını və “bütün təcavüz formalarına” son qoyulmasını qrupun tərksilah olunması üçün əsas şərt kimi göstərirlər.
Münaqişə fonunda BMT və bir sıra beynəlxalq və İsrail hüquq-müdafiə təşkilatları İsraili Qəzzada mülki şəxsləri və infrastrukturu genişmiqyaslı şəkildə hədəfə almaqda ittiham edib. İsrail isə mülki şəxsləri qəsdən hədəf aldığını inkar edir və dağıntılara görə HƏMAS-ı məsul tutur.
BMT-nin məlumatına görə, Qəzzadakı yaşayış məntəqələrinin ən azı 92 faizi 2023-cü ilin oktyabrından 2025-ci ilin oktyabrınadək tamamilə dağıdılıb və ya zərər görüb. BMT-nin mənzil məsələləri üzrə xüsusi məruzəçisi Balakrişnan Racagopal bölgədəki dağıntıları yaşayış və mülki infrastrukturun genişmiqyaslı və ya sistematik şəkildə məhv edilməsi kimi qiymətləndirib.
Qeyd edək ki, Donald Tramp ötən il Qəzzanı “Yaxın Şərqin Rivierası”na çevirmək planını açıqlamış və fələstinlilərin başqa ərazilərə köçürülməsi ideyasını irəli sürmüşdü. Təklif ərəb ölkələri, Avropa İttifaqı və BMT tərəfindən rədd edilmişdi.
