Vətəninfo.az xəbər verir ki, Ümumdünya Səhiyyə Təşkilatının baş direktoru Tedros Adhanom Qebreyesus özünün X səhifəsində yazıb ki , son bir həftə ərzində Avropada həddindən artıq istilər səbəbindən 1300-dən çox insan ölüb .
“21 iyundan bəri Avropada yüksək temperatur səbəbindən 1300-dən çox ölüm halı qeydə alınıb. İstilik stressi tez-tez “səssiz qatil” adlanır və Avropanın evləri, iş yerləri və məktəbləri bu cür temperatur üçün nəzərdə tutulmayıb”, – deyə o yazıb.
ÜST rəhbəri qeyd edib ki, Avropa Yer kürəsində ən sürətli istiləşmənin baş verdiyi qitədir: temperaturun artım sürəti qlobal orta göstəricidən iki dəfə çoxdur.
“Hazırda 150 milyon insan həddindən artıq istidən əziyyət çəkir. Yüzlərlə insan ölüb, məktəblər bağlanıb və enerji sistemləri öz həddində işləyir”, – deyə o qeyd edib.
Qebreyesus qeyd edib ki, iqlim dəyişikliyi və qlobal istiləşmənin təsiri altında əvvəllər “nəsildə bir dəfə” fenomeni hesab edilən anormal istilər indi demək olar ki, hər il müşahidə olunur.
ÜST Avropa ölkələrini əhali sağlamlığını iqlim dəyişikliyinin təsirlərindən qorumaq üçün daha geniş bir planın bir hissəsi olaraq istiliklə əlaqəli sağlamlıq fəaliyyət planlarını həyata keçirməyə çağırıb.
İyun ayının ortalarında Avropada anormal isti hava şəraiti hökm sürür. Bir sıra ölkələrdə havanın temperaturu 40 dərəcəyə yaxınlaşır, bəzi yerlərdə isə hətta onu keçib. Ən yüksək hava təhlükəsi səviyyəsi olan qırmızı səviyyə Fransa, Böyük Britaniya, Hollandiya və İtaliyada müəyyən edilib.
