Rusiya Prezidentinin sözçüsü Dmitri Peskov bildirib ki, Finlandiyanın NATO-ya üzv olması Rusiya üçün təhlükə yaradır.
Vətəninfo.az xəbər verir ki, bu barədə Dmitri Peskov paytaxt Moskvada jurnalistlərə müsahibəsində bildirib.
Dmitri Peskov bildirib ki,Finlandiyanın NATO-ya daxil olması Avropada sabitliyi və təhlükəsizliyi gücləndirməyəcək. “Finlandiya NATO-ya daxil olduqdan sonra Rusiya öz təhlükəsizliyini təmin etmək üçün əlavə tədbirlərə ehtiyac duyacaq, lazım olan hər şeyi edəcək”,-deyə Dmitri Peskov vurğulayıb.
Finlandiya 2022-ci il mayın 18-də İsveçlə NATO-ya üzvlük üçün müraciət edib.
2022-ci il 28-30 iyun tarixlərində keçirilən Madrid Sammitində Türkiyə, Finlandiya və İsveç arasında Üçtərəfli Memorandum imzaladı.
Sammitdən sonra NATO ölkələrinin əksəriyyəti iki ölkənin üzvlüyünün təsdiqi prosesinə başlayıb.
NATO-nun 20 ölkəsi iyulda, 4-ü avqustda, 4-ü isə sentyabrda öz parlamentlərində ratifikasiya prosesini başa çatdırıb.
Martın 27-də Macarıstan parlamenti Finlandiyanın üzvlüyünü təsdiqləyib.
Martın 30-da isə Türkiyə Böyük Millət Məclisi Finlandiyanın NATO-ya üzvlüyü ilə bağlı qanun layihəsini qəbul edib.
Qeyd edək ki, Finlandiya dünən NATO-ya rəsmi üzv olub.
