ABŞ-ın Şimali Amerika Aerokosmik Müdafiə Komandanlığına (NORAD) məxsus F-16 qırıcıları Nyu-Cersi ştatının Bedminster bölgəsində müvəqqəti uçuş məhdudiyyətlərini pozan bir neçə yüngül təyyarəni ələ keçirib.
Vətəninfo.az xəbər verir ki, hadisə ABŞ Prezidenti Donald Trampın qolf klubunun yerləşdiyi ərazinin üzərində baş verib.
NORAD-ın məlumatına görə, uçuş məhdudiyyətlərini pozan bütün təyyarələr təhlükəsiz şəkildə qadağan olunmuş ərazidən çıxarılıb və komandanlığa məxsus qırıcılar tərəfindən məhdudiyyət zonasının hüdudlarından kənara qədər müşayiət olunub.
NORAD pilotları təyyarə sahiblərini və pilotları uçuşdan əvvəl ABŞ Federal Aviasiya Administrasiyasının (FAA) yayımladığı Təyyarəçilər üçün Bildirişləri (NOTAM) və qüvvədə olan müvəqqəti uçuş məhdudiyyətlərini diqqətlə yoxlamağa çağırıb.
Qeyd edək ki, ABŞ prezidentinin Nyu-Cersidəki qolf klubunun yerləşdiyi ərazi üzərində müəyyən dövrlərdə təhlükəsizlik məqsədilə müvəqqəti uçuş məhdudiyyətləri tətbiq olunur.
