İranın birinci vitse-prezidenti Məhəmməd Rza Arif ABŞ-ın hərbi uğursuzluqlarını İrana qarşı iqtisadi təzyiqlərlə kompensasiya etməyə çalışdığını bildirib.
Arif qeyd edib ki, İran hərbi qarşıdurmada olduğu kimi, “iqtisadi müharibə”də də ABŞ-ın təzyiqlərinin öhdəsindən gələ bilər.
Vətəninfo.az xəbər verir ki, bu barədə İran mediası məlumat yayıb.
İranın birinci vitse-prezidenti Bazarın Tənzimlənməsi Qərargahının iclasında çıxışı zamanı bildirib ki, ABŞ hazırda hərbi cəbhədəki uğursuzluqlarını iqtisadi təzyiqlərlə kompensasiya etməyə çalışır.
“Düşmən indi hərbi cəbhədəki məğlubiyyətini iqtisadi müharibə yolu ilə kompensasiya etmək istəyir. Hökumət isə düzgün planlaşdırma ilə bu yanaşmaya qətiyyətlə qarşı çıxmalıdır”, – deyə Arif bildirib.
O, administrasiyanın çətin müharibə şəraitində ölkəni birlik və koordinasiya şəraitində idarə etdiyini vurğulayıb.
Vitse-prezidentin sözlərinə görə, ABŞ iqtisadi müharibədə daha çox resursa malik ola bilər. Lakin son dövrlərdə İrana qarşı baş verən iki müharibənin təcrübəsi göstərib ki, milli birlik və həmrəylik düşmənin qarşısında dayanmaq üçün əsas amillərdəndir.
“Belə hallarda milli maraqlar naminə fraksiya, siyasi və partiya baxışları kənara qoyulmalıdır”, – Arif qeyd edib.
Məhəmməd Rza Arif həmçinin ölkədə bazara nəzarətin gücləndirilməsinin vacibliyini vurğulayıb.
O, tənzimləyici və yoxlama qurumlarını qiymətlərin süni şəkildə artırılması, bazarda qiymətlərin aşağı salınması və məhsulların yığılaraq dövriyyədən çıxarılması hallarına qarşı ciddi tədbirlər görməyə çağırıb.
Xatırladaq ki, iyun ayında Vaşinqton və Tehran Pakistanın vasitəçiliyi ilə bütün cəbhələrdə, o cümlədən Livanda hərbi əməliyyatların dayandırılması, Hörmüz boğazının yenidən açılması və İranın dəniz blokadasının aradan qaldırılmasını nəzərdə tutan anlaşma memorandumu elan etmişdi.
Lakin iyul ayında ABŞ İranı Hörmüz boğazında gəmiləri hədəfə almaqda ittiham edərək ölkə ərazisindəki müxtəlif hədəflərə zərbələri bərpa edib. Buna cavab olaraq İran da Yaxın Şərqdəki ABŞ mövqelərinə zərbələr endirib.
Son həftələrdə isə tərəflərin razılığa gəlmək məqsədilə dolayı danışıqlar apardığı bildirilir.
