İsveç Rusiyanın siyasi rəhbərliyi barədə məlumat toplamaq və təhlil imkanlarını gücləndirmək məqsədilə yeni mülki xarici kəşfiyyat xidməti yaradır.
Vətəninfo.az xəbər verir ki, bu barədə ölkənin keçmiş baş naziri Karl Bildt The Economist jurnalına müsahibəsində bildirib.
Məlumata görə, İsveç Xarici Kəşfiyyat Xidməti (UND) ilk dəfə bu ilin may ayında elan edilib və 2027-ci ilin yanvarından fəaliyyətə başlaması planlaşdırılır. Yeni qurumun Böyük Britaniyanın xarici kəşfiyyat xidməti MI6 modeli əsasında formalaşdırılacağı bildirilir.
The Economist yazır ki, təşəbbüsün müəlliflərindən biri Karl Bildtdir. Onun fikrincə, İsveçin mövcud hərbi kəşfiyyat sistemi Rusiyanın siyasi rəhbərliyini və Kremlin qərarvermə prosesini kifayət qədər effektiv təhlil edə bilməyib. Bildt qeyd edib ki, mövcud sistem hərbi vəziyyəti izləməkdə uğurlu olsa da, Rusiyanın siyasi kursunu və gələcək addımlarını qiymətləndirməkdə zəif qalıb.
Jurnalın məlumatına əsasən, İsveç rəhbərliyi 2022-ci ildə Rusiyanın Ukraynaya genişmiqyaslı hərbi müdaxilə etməyəcəyini hesab edib və yeni strukturun yaradılması ilə gələcəkdə belə qiymətləndirmə səhvlərinin təkrarlanmasının qarşısını almağı hədəfləyir.
Yeni kəşfiyyat xidməti İsveçin Hərbi Kəşfiyyat və Təhlükəsizlik Xidməti (MUST) ilə koordinasiyalı fəaliyyət göstərəcək. Həmçinin xaricdə agentlərin iştirakı ilə həyata keçirilən bəzi məxfi əməliyyatların idarə olunması da UND-nin səlahiyyətlərinə veriləcək.
İslahat İsveçin 2024-cü ildə NATO-ya üzv olmasından və təxminən iki əsr davam edən hərbi bitərəflik siyasətinə son qoymasından sonra həyata keçirilir.
Karl Bildt 2006–2014-cü illərdə İsveçin xarici işlər naziri olub və Ukraynanın Avropa İttifaqı ilə inteqrasiyasını dəstəkləyən siyasətçilərdən biri kimi tanınır. O, 2009-cu ildə Polşa ilə birlikdə Aİ-nin Şərq Tərəfdaşlığı təşəbbüsünün yaradılmasında iştirak edib.
Məqalədə həmçinin xatırladılır ki, 2013-cü ilin sonlarında Ukraynada Avropa İttifaqı ilə assosiasiya sazişinin imzalanmasının təxirə salınmasından sonra Avromaydan etirazları başlayıb. Sonrakı hadisələr 2014-cü ilin fevralında prezident Viktor Yanukoviçin hakimiyyətdən uzaqlaşdırılması ilə nəticələnib.
