Fransa prezidenti Emmanuel Makron Avropa Komissiyasının sədri Ursula fon der Leyendən 15 yaşdan kiçik insanların sosial mediadan istifadəsini qadağan edən Avropa miqyaslı qanun layihəsi hazırlamasını istəyib. Agence France-Presse agentliyi Fransa liderinin məktubuna istinadən xəbər verir.
Vətəninfo.az xəbər verir ki, sənəddə Makron “Avropa Birliyindəki bütün uşaqların qorunmasına” çağırır və Avropa Komissiyası mütəxəssislərinin bu prosesdə fəal iştirak edəcəyinə ümid etdiyini bildirir. Onun sözlərinə görə, bu gün daha da irəli gedərək yeni Avropa qanununda vahid qaydalar müəyyən etmək, bütün Aİ ərazisində 15 yaşdan kiçik şəxslərin sosial şəbəkələrə çıxışını qadağan etmək lazımdır.
Makron məktubda vurğulayıb ki, “vəziyyət gecikməyə dözmür”.
Fransa Prezidentinin sözlərinə görə, yaş yoxlaması eyni zamanda şəxsi məlumatların qorunmasını təmin edəcək etibarlı milli və Avropa alətlərinə əsaslanmalıdır. Bundan əlavə, Makron təklif edir ki, gələcək Avropa qanunvericiliyi sosial şəbəkələrin asılılıq yaradan funksiyalarını açıq şəkildə məhdudlaşdırmağı və platformalardan istifadə üçün vaxt məhdudiyyətləri də daxil olmaqla, təhlükəsizlik standartlarını əvvəldən tətbiq etməyi mümkün etməlidir.
Daha əvvəl Fransa Konstitusiya Şurası Makronun təklif etdiyi qadağanın Avropa Birliyi qanunlarına zidd olduğuna qərar vermişdi. Buna baxmayaraq, Makron bu qanunun 2027-ci ilin yazına qədər qəbul edilməsinə nail olmaq niyyətindədir.
