Suriyanın paytaxtı Dəməşqdə Fransa Prezidenti Emmanuel Makronun qaldığı hotelin yaxınlığında iki partlayış baş verib.
Vətəninfo.az xəbər verir ki, Suriyanın dövlət xəbər agentliyi SANA-nın məlumatına görə, hadisə nəticəsində 18 nəfər xəsarət alıb. Yaralananlardan dördünün polis əməkdaşı olduğu bildirilir.
Məlumata görə, partlayışlar Makronun rəsmi səfəri zamanı yerləşdiyi “Four Seasons” hotelinin yaxınlığında qeydə alınıb. Əl-Ərəbiyyə telekanalının yaydığı xəbərə əsasən, partlayışların səbəbi hələlik müəyyən edilməyib.
Bildirilir ki, Fransa prezidentinin korteji partlayışlardan qısa müddət əvvəl hoteli tərk edib. Hadisə zamanı Emmanuel Makronun təhlükəsizliyi ilə bağlı hər hansı problem yaşanmadığı qeyd olunur.
Xatırladaq ki, Fransa Prezidenti Emmanuel Makron ötən gün axşam saatlarında rəsmi səfər çərçivəsində Suriyanın paytaxtı Dəməşqə gəlib.
Hadisə ilə bağlı araşdırma aparılır. Partlayışların səbəbi və digər təfərrüatlar barədə hələlik rəsmi açıqlama verilməyib.
