NATO müttəfiqləri Rusiyadan gələ biləcək hərbi təhdidlərə qarşı müdafiə imkanlarını gücləndirmək məqsədilə 2029-cu il üçün yeni hərbi hədəflər müəyyənləşdirməyə hazırlaşır.
“Politico” nəşrinin məlumatına görə, alyans üzvləri bu ay Rusiyanın mümkün hücumuna qarşı hansı hərbi qüvvə və silah sistemlərinin tələb olunacağı, eləcə də müdafiə xərclərinin necə bölüşdürüləcəyi ilə bağlı danışıqlara başlayacaqlar.
Yeni plan çərçivəsində NATO-nun 32 üzv ölkəsinin hər birinə konkret hərbi qüvvə və texnika təmin etmək öhdəliklərinin müəyyənləşdirilməsi nəzərdə tutulur. Avropalı rəsmilər xəbərdarlıq edirlər ki, Rusiya 2029-cu ilə qədər NATO üzvlərindən birinə hücum etmək imkanına malik ola bilər.
Eyni zamanda, ABŞ Prezidenti Donald Trampın administrasiyası Amerika qoşunlarının Avropadakı sayını əhəmiyyətli dərəcədə azaltmaq imkanını nəzərdən keçirir. Belə bir qərar alyansda canlı qüvvə çatışmazlığına, həmçinin havada yanacaq doldurma təyyarələri, uzaqmənzilli raketlər, kəşfiyyat və müşahidə sistemləri kimi mühüm hərbi imkanların zəifləməsinə səbəb ola bilər.
Danışıqlar zamanı NATO ölkələrinin müdafiəyə nə qədər vəsait ayırmağa hazır olduğu, Avropanın ABŞ-ın hərbi dəstəyi olmadan fəaliyyət göstərmək imkanları və robototexnika ilə süni intellektin hərbi planlaşdırmada tətbiqi məsələləri də müzakirə ediləcək.
Nəşrin danışdığı, adının açıqlanmasını istəməyən yüksək rütbəli NATO diplomatı qarşıda ciddi çətinliklərin olduğunu bildirib.
“Bu, çətin olacaq. Yükün bölüşdürülməsi, ABŞ məsələsi, iddialı hədəflərlə siyasi prioritetlərin uzlaşdırılması… Bunlar çox böyük məsələlərdir”, – deyə diplomat vurğulayıb.
Məlumata görə, NATO müttəfiqləri yaxın günlərdə yeni müdafiə hədəflərini müəyyənləşdirəcək “Siyasi Rəhbərlik” (Political Guidance) adlı sənəd üzrə müzakirələrə başlayacaqlar. Bu sənəd alyansın beş mərhələdən ibarət NATO Müdafiə Planlaşdırma Prosesinin ilk addımı hesab olunur.
NATO-nun Transformasiya üzrə Ali Müttəfiq Komandanı, fransalı admiral Pyer Vandye isə prosesin məqsədinin mövcud imkanların sadəcə tətbiqi ilə məhdudlaşmamalı olduğunu bildirib.
“Əsas məqsəd bunun sadəcə mövcud həllərin tətbiqi deyil, əsl transformasiya dövrü olmasını təmin etməkdir”, – deyə o qeyd edib.
“Politico” nəşri müzakirələrin əsas istiqamətlərini müəyyənləşdirmək üçün NATO-nun hazırkı və keçmiş 15 rəsmisi və diplomatı ilə söhbət aparıb.
