Rusiyanın Ukraynaya təcavüzündən sonra verdiyi itkilərlə bağlı yeni dəhşətli rəqəmlər açıqlanıb. Məlumata görə, bu rəqəmlər güman edildiyindən 30-40 çoxdur.
ABŞ-ın Strateji və Beynəlxalq Araşdırmalar Mərkəzinin məlumatına görə, Rusiya İkinci Dünya müharibəsindən bəri ən böyük itkilərini Ukraynadakı müharibədə verib.
Bildirilib ki, Rusiyanın Ukraynadakı itkiləri təxminən 200-250 mindir: “Buraya Rusiya Silahlı Qüvvələrinin hərbçiləri ilə yanaşı, “Vaqner” muzdlu hərbi təşkilatının nümayəndələri, qondarma DNR və LNR silahlıları, həmçinin digər qruplaşmalar daxildir”.
Analitiklərin fikrincə, Rusiyanın Ukraynadakı itkiləri əvvəlki münaqişələrdəki, o cümlədən Əfqanıstan, Çeçenistan müharibələrindəki itkilərdən dəfələrlə çoxdur.
Mərkəzin hesabatında bildirilib ki, Kreml Ukraynaya qarşı müharibə ilə bağlı yanlış hesablamalar aparmışdı: “Rusiyada elə bilirdilər ki, ukraynalılar Ukraynadakı mövcud hakimiyyəti və Prezidenti Volodimir Zelenskini dəstəkləməyəcəklər. Ukraynanın uğuru həm də texnika, xüsusilə PUA-larla bağlıdır”.
