Ötən gün Fransa senatı erməni diasporu və onlara havadarlıq edən senatorlar tərəfindən irəli sürülən, Azərbaycan əleyhinə olan qətnaməni 295 səslə qəbul etdi. Qətnamə, qərəzli olmaqla yanaşı, beynəlxalq hüquqa ziddir və reallıqla heç bir əlaqəsi yoxdur. Milli Məclisin üzvü, AŞPA-da Azərbaycan nümayəndə heyyətinin rəhbəri Səməd Seyidov Vətəninfo.az-a bildirib ki, Fransa senatının qəbul etdiyi qərar, məntiqsiz, reallıqdan uzaqdır: “ Bu da ondan ibarətdir ki, artıq Fransa bir dövlət kimi özünü vasitəçilik missiyasından kənar qoymaqda “xüsusi” bir addım atdı. Belə münasibətlə, belə yanaşma ilə regionda vasitəçi olmaq, obyektiv olmaq demək olar ki, mümkün deyil. Ən faciəvi məsələ ondan ibarətdir ki, bu qətnamədən sonra, böyük ehtimalla hökumət nümayəndələri tamamilə başqa sözləri, fikirləri deyəcəklər ki, bu parlamentdi, bu qətnamənin heç bir əhəmiyyəti yoxdur, bizim siyasətimiz dürüstür”.
Səməd Seyidov vurğulayıb ki, hamı üçün aydındır ki, onların ikiüzlü siyasəti, tərəf tutmaları heç zaman obyektiv qiymətləndirilə bilməz: “İkincisi isə, təssüflər olsun Fransa özü-özünü çox çətin və çıxılmaz bir vəziyyətə qoyur. Bu Azərbaycanla bağlı deyil. Bu hadisələr Fransanın Avropadakı reallığını da şübhə altına salır. ”.
AŞPA-da nümayəndə heyətimizin rəhbərinin sözlərinə görə, artıq Fransanın bu əməli regiondakı vəziyyətə müdaxilədir: “ Avropa Fransadan ibarət deyil. Biz bu prosesi Avropa Birliyinin ən yüksək səviyyədə nümayəndələri tərəfindən görürük və prezident Şarıl Mişelin prezident İlham Əliyevlə söhbətləri, danışıqları, regiona münasibəti bunu konkret və açıq şəkildə göstərir. Ona görə də hesab edirəm ki, biz çox düzgün bu addımı qiymətləndirməliyik. Bu Fransanın sonuncu yapışacağı alətlərdən biridir ki, öz nüfuzunu saxlaya bilsin. Ancaq bunların axırı yoxdur. Necə ki, xanım İkres son anda ermənilərin dəstəyini əldə etmək üçün regiona gəldi və ondan sonra prezident seçkilərində uduzdu, necə ki, Nensi Pelosi ermənilərin dəstəyini əldə etmək üçün regiona gəldi, sonra isə seçkilərdə Demokrat Partiyası çox böyük çətinliklərə düşdü, mən əminəm ki, eyni vəziyyətdə, eyni prosesdə Fransada müşahidə olunacaq”.
Zərri
Vətəninfo.az