Britaniyalı ağır çəkili boksçular Tayson Fyuri və Entoni Coşua arasında uzun müddətdir gözlənilən superdöyüşün keçirilməsi ilə bağlı razılıq əldə olunub.
Daily Mail Sportun məlumatına görə, tərəflər döyüş üçün müqavilə imzalayıblar. Qarşılaşmanın 20 noyabr 2026-cı ildə ABŞ-ın Nyu-York şəhərində keçirilməsi planlaşdırılır. Döyüş üçün əsas məkan kimi məşhur “Madison Square Garden” arenası nəzərdən keçirilir.
Məlumata görə, tərəflər əsas danışıqları bu həftənin əvvəlində yekunlaşdırıblar. Hazırda yalnız döyüşün keçiriləcəyi məkanla bağlı son qərarın verilməsi gözlənilir.
Təşkilatçıların qarşılaşmanı cümə gününə salmasının səbəbi ABŞ-da keçiriləcək digər böyük idman tədbirləri ilə vaxt baxımından toqquşmanın qarşısını almaq və döyüşə maksimum tamaşaçı marağı yaratmaqdır.
Döyüşün Böyük Britaniyada keçirilməsi variantı da əvvəlcə müzakirə olunub. Lakin maliyyə şərtlərinə görə bu plan baş tutmayıb və nəticədə Nyu-York variantına üstünlük verilib.
“Madison Square Garden” arenası Coşua üçün xüsusi əhəmiyyət daşıyır. O, 2019-cu ilin iyununda məhz burada Endi Ruizə uduzaraq peşəkar karyerasında ilk məğlubiyyətini alıb.
Məlumata görə, Fyuri ilə Coşua arasındakı döyüşün avqustun sonuna qədər rəsmi şəkildə elan edilməsi gözlənilir. Qarşılaşmanın təqdimat mərasiminin isə Böyük Britaniyanın məşhur məkanlarından birində keçirilməsi planlaşdırılır.
Fyuri sosial şəbəkədə paylaşdığı videoda qarşıdakı döyüşlə bağlı azarkeşlərə mesaj göndərib:
“Çox tezliklə böyük xəbərlər gələcək. Üfüqdə böyük bir döyüş var. Bu, hamınızın gözlədiyi döyüşdür.”
Əgər tarix və məkan rəsmi təsdiqlənərsə, bu qarşılaşma uzun illərdir danışıqları aparılan iki britaniyalı ağır çəkili boksçunun ilk üz-üzə döyüşü olacaq.
Ukraynalı ağır çəkili boksçu Aleksandr Usik də gözlənilən qarşılaşma barədə fikirlərini bölüşüb.
Usik daha əvvəl Coşuanın alban boksçu Kristian Prenqa üzərində qələbəsini yüksək qiymətləndirib və onu növbəti mübahisəsiz dünya çempionu kimi gördüyünü bildirib.
Ukraynalı boksçu Fyurinin Coşuaya uduzacağını düşündüyünü deyib. Usik Fyuriyə müraciətində belə ifadə işlədib:
“Özünü itir, acgöz piy. O, səni nokaut edəcək.”
