Rusiya Prezidenti Vladimir Putin, Ukrayna pilotsuz uçuş aparatlarının (PUA) Rusiya ərazisinə, xüsusən də paytaxt Moskva və ətraf bölgələrə artan zərbələri fonunda çıxılmaz vəziyyətdə qalıb. “The Hill” qəzetinin məlumatına görə, bu fikirləri ABŞ-ın sabiq müdafiə naziri Leon Panetta səsləndirib.
Pentaqonun keçmiş rəhbəri Ukrayna ordusunun Rusiyanın Dubna şəhərində yerləşən peyk rabitə mərkəzinə endirdiyi uğurlu zərbəni xüsusi qeyd edib. Sözügedən mərkəz Kremlin kəşfiyyat məlumatlarının toplanması və hərbi əməliyyatların koordinasiyasında mühüm rol oynayır. Bu, Kiyevin son vaxtlar həmin strateji obyektə təşkil etdiyi ikinci uğurlu hücumdur.
“Artıq aydın görünür ki, Putin küncə sıxışdırılıb və yaranmış vəziyyətdə nə edəcəyini tam olaraq bilmir”, — deyə Panetta vurğulayıb.
Panettanın fikrincə, mövcud şəraitdə Rusiya lideri atəşkəsə razı olmalıdır. Lakin Putinin xarakterini rəhbər tutan sabiq nazir hesab edir ki, Kreml rəhbəri belə addımlara müqavimət göstərməkdə davam edəcək və bu, Rusiya üçün daha ağır bədəllərlə nəticələnəcək.
Vaşinqtonun Ukraynaya göstərə biləcəyi ən effektiv köməyin silah tədarükünü artırmaq olduğunu deyən Panetta, bunun Rusiyanın məğlubiyyətini sürətləndirəcəyini bildirib. O, həmçinin ABŞ-ın keçmiş prezidenti Donald Trampa da çağırış edib:
“Prezident Tramp üçün ən ağıllı addım gec olmadan qalib gələcək tərəfi, yəni Ukraynanı dəstəkləmək olar.”
Ukrayna zərbələrinin coğrafiyası genişlənir: Rusiya dərinliklərində təşviş
“Bloomberg” agentliyinin analitiklərinin rəyinə görə, Ukraynanın uzaq mənzilli PUA-lardan, həmçinin “Neptune” və “Flamingo” raketlərindən istifadə etməsi müharibənin gedişatında keyfiyyət dəyişikliyinə səbəb olub. Bu hücumlar təkcə hərbi deyil, həm də ciddi iqtisadi və psixoloji təsir yaradır.
Hazırda Ukrayna ordusunun hava zərbələri Rusiya ərazisinin demək olar ki, yarısını əhatə edir. Cari il ərzində Rusiya Federasiyası əhalisinin 70%-dən çoxunun yaşadığı regionlarda, o cümlədən Ural və Qərbi Sibirin ən ucqar bölgələrində belə raket təhlükəsi siqnalları işə düşüb.
