Ukraynanın işğal altında olan Krımda hərbi, enerji və logistika obyektlərinə endirdiyi zərbələr Rusiya prezidenti Vladimir Putini daha sərt addımlar atmağa sövq edə bilər. Vətəninfo.az xəbər verir ki, bu barədə “The Telegraph” nəşri yazıb.
Məqalədə qeyd olunur ki, Krım uzun illərdir Rusiya ilə Qərb arasında əsas geosiyasi qarşıdurma nöqtələrindən biri hesab olunur. Nəşrin fikrincə, Moskvanın 2014-cü ildə yarımadanı ilhaq etməsindən sonra Qərbin əsasən sanksiyalar və siyasi bəyanatlarla kifayətlənməsi Kremlə ciddi hərbi nəticələrlə üzləşməyəcəyi mesajını verib.
Bildirilir ki, Ukrayna son dövrlərdə xüsusilə pilotsuz uçuş aparatlarından istifadə etməklə Krımdakı Rusiya hərbi infrastrukturuna zərbələri artırıb. Bu hücumların yarımadadakı logistika və hərbi fəaliyyətə ciddi təsir göstərdiyi, bəzi ərazilərdə fövqəladə vəziyyətin elan edilməsinə səbəb olduğu vurğulanır.
Nəşr hesab edir ki, Ukrayna və onun müttəfiqləri üçün bu zərbələr Rusiya ordusunun zəiflədiyini göstərsə də, əsas sual Kremlin buna necə cavab verəcəyidir.
Məqalədə həmçinin bildirilir ki, Ukrayna dronlarının Rusiyanın müxtəlif bölgələrində, o cümlədən iri şəhərlərdə hədəflərə zərbələr endirməsi Kremlin müharibə ilə bağlı informasiya nəzarətini çətinləşdirir və rəsmi Moskvanın ictimaiyyətə “uğurlu hərbi əməliyyat” görüntüsü yaratmasını mürəkkəbləşdirir.
“The Telegraph” ehtimal edir ki, Vladimir Putin Kiyevə hücumların intensivliyini artırmaq və ya digər təhlükəli eskalasiya addımlarına əl atmaq variantlarını nəzərdən keçirə bilər. Nəşr əlavə edir ki, gələn ay Ankarada keçiriləcək NATO sammitində alyans liderləri Moskvanın mümkün addımlarını müzakirə etməli və buna hazır olmalıdırlar.
Ukrayna Hərbi Dəniz Qüvvələrinin sözçüsü Dmitri Pletençuk bildirib ki, Krımda Rusiya logistikasına endirilən zərbələr uzunmüddətli əməliyyatın tərkib hissəsidir və əsas hədəflərdən biri Kerç körpüsüdür.
Bundan başqa, Müharibənin Öyrənilməsi İnstitutu (ISW) hesab edir ki, Ukraynanın hücumları nəticəsində yarımadada yaranan yanacaq çatışmazlığı minlərlə insanın Krımı tərk etməsinə səbəb olub. Analitiklərin fikrincə, bölgəni tərk edənlər arasında rusiyalı turistlər, Rusiya hərbçiləri, təhlükəsizlik strukturlarının əməkdaşları və işğal administrasiyasının nümayəndələri də var.
Krımın Rusiya tərəfindən təyin olunmuş rəhbəri Sergey Aksyonov isə yarımadada yanacaq və elektrik enerjisi ilə bağlı ciddi problemlərin olduğunu etiraf edib. O, Krımın “çətin dövr” keçirdiyini bildirərək, ən ciddi problemin yanacaq təminatı olduğunu vurğulayıb.
